Prezident raisligida o‘tkazilgan yig‘ilishda muhandislik yo‘nalishlari bo‘yicha “Eng yaxshi g‘oya”, “Eng yaxshi loyiha” va “Eng yaxshi ixtiro” respublika tanlovi o‘tkazilishi aytildi. Bu haqda Prezident matbuot xizmati xabar berdi.
Tanlovda o‘qituvchilar, talabalar va amaliyotchi muhandislar ishtirok etishi mumkin bo‘ladi. Birinchi o‘ringa elektromobil beriladi.
Shuningdek, g‘oya, loyiha va ixtiro muallifi bo‘lgan eng zo‘r 10 nafar ishtirokchi Germaniya, Yaponiya, Xitoy, Rossiya, Italiya, Turkiya, Janubiy Koreya, Singapur kabi davlatlarga stajirovkaga yuboriladi.
Bu maqsadlar uchun har yili 15 milliard so‘m ajratiladi.
So‘ng davlat rahbari olimlar, texnik yo‘nalishdagi oliygoh kafedra mudirlari, o‘quv va ilmiy markazlar rahbarlari bilan muloqot qildi. Muloqot chog‘ida bildirilgan fikr va takliflarni chuqur o‘rganib, amaliyotga joriy etish yuzasidan mutasaddilarga qator topshiriqlar berdi.
“Bugungi ko‘tarilgan masalalar, berilgan takliflar ertangi kunimiz uchun, iqtisodiyotimiz uchun juda muhim”, — dedi davlat rahbari yig‘ilish yakunida.
Iqtisodiyotni jadal o‘sishini taʼminlashda bizga yuqori malakali muhandis-texnologlar suv bilan havodek zarur ekani taʼkidlandi.
Har bir vazir, tarmoq rahbari, rektor va professor-o‘qituvchi masʼuliyatni chuqur his qilib, qattiq ishlasa, izlansa, bu vazifani albatta uddalashiga ishonch bildirildi.
Yig‘ilish davomida tarmoq va hududlar rahbarlarining axboroti tinglandi.
Izoh (0)