Andijon viloyatining Buloqboshi, Navoiy viloyatining Karmana tumanlari hamda Qashqadaryo viloyatida kredit mablag‘larini o‘zlashtirish holatlari aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, departamentning Buloqboshi tuman bo‘limi tomonidan o‘tkazilgan tergovga qadar tekshiruvlarda “B.t.” MCHJ masʼul shaxslari va boshqalar parrandachilik faoliyatini tashkil etishda uskunalar sotib olish uchun tijorat banki filialidan ajratilgan kredit mablag‘larining 5,2 mlrd so‘mini, “Z.t.” MCHJ masʼul shaxslari esa tikuv dastgohlari sotib olish uchun ajratilgan 950 mln so‘m imtiyozli kredit mablag‘ini o‘zlashtirish yo‘li bilan talon-toroj qilganliklari aniqlangan.
Departamentning Karmana tuman bo‘limi tomonidan o‘tkazilgan tergovga qadar tekshiruvda “K.C.H.” oilaviy korxonasi rahbari X.Ya. mineral o‘g‘it va yoqilg‘i moylash mahsulotlari xarid qilish uchun hududiy tijorat banki filialidan ajratilgan 425 mln so‘m kredit mablag‘larini boshqa maqsadlarda sarflab, o‘zlashtirganligi aniqlangan.
Shu kabi departamentning Qashqadaryo viloyat boshqarmasi tomonidan o‘tkazilgan tergovga qadar tekshiruvlarda “I.C.H.” xususiy korxonasi rahbari X.K. 11 nafar fuqaroga tadbirkorlik faoliyatini rivojlantirish uchun ajratilgan imtiyozli kredit mablag‘i evaziga taʼminotchi korxona sifatida mahsulotlarni yetkazib bermasdan 348,2 mln so‘mni o‘zlashtirish yo‘li bilan talon-toroj qilganligi aniqlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)