Oliy Majlisning Inson huquqlari bo‘yicha vakili (ombudsman)ning Jizzax viloyatidagi mintaqaviy vakiliga bir guruh fuqarolar oylik ish haqlari plastik kartochkaga kelib tushganda bank asossiz ravishda “kreditdan bo‘lgan qarzdorligi uchun” deb pullarini yechib olib qo‘yganidan norozi bo‘lib shikoyat qilgan. Bu haqda ombudsman matbuot xizmati xabar berdi.
Murojaatchilarning qayd etishicha, ular “Agrobank” ATB Arnasoy filiali bilan kredit shartnomasi rasmiylashtirishgan. Lekin mazkur bank filiali boshqaruvchisi o‘rinbosari S.A. ularga qo‘ng‘iroq qilib, oylik maoshlari kamligi sababli kredit mablag‘lari berilmaydigan bo‘lganini og‘zaki xabar qilgan va o‘z mansab mavqeidan foydalanib, bir qator fuqarolar nomiga kredit rasmiylashtirgan. Jumladan murojaatchi A.I. nomiga jami 18,5 million so‘m yillik 26,99 foiz ustama haq to‘lash sharti bilan 4 yil muddatga kredit olgan.
Fuqaro o‘zining nomiga chiqarilgan bank kredit kartasini olishni rad etgan bo‘lsada, ularning xabarisiz ushbu karta mablag‘larini o‘z nomiga ochilgan bank plastik kartalariga o‘tkazishga erishib, kredit mablag‘larini o‘z manfaatlari yo‘lida o‘zlashtirgan.
Jinoyat ishlari bo‘yicha Paxtakor tuman sudining 2023-yil 11-apreldagi hukmiga ko‘ra, S.A. Jinoyat kodeksining bir qancha moddalari bilan aybdor deb topilib, bank sohasida hamda boshqa tashkilotlarda mansabdorlik va moddiy javobgarlik lavozimlarida ishlash huquqidan mahrum etilgan hamda unga 7 yilga ozodikdan mahrum etish jazosi tayinlangan. Shuningdek, ayblanuvchi S.A.dan jami 145 million so‘m miqdorida moddiy zarar sifatida “Agrobank” ATB Arnasoy filiali foydasiga undirish belgilangan.
Shunday bo‘lsada, mazkur bank filiali tomonidan kreditni qoplash uchun murojaatchilar nomiga SMS talabnomalar kelib, plastik kartalariga kelib tushgan oylik ish haqidan kreditlarni qoplash uchun pul undirilishi davom etgan, — deyiladi xabarda.
Hujjatlar o‘rganilib, ombudsman tomonidan sudga mehnat qonunchiligining buzilgani holati bo‘yicha fuqarolar manfaatida daʼvo ariza kiritilgan. Natijada Fuqarolik ishlari bo‘yicha Do‘stlik tumanlararo sudining 2024-yilning 21-may kunidagi hal qiluv qarori bilan fuqarolar va bank o‘rtasida tuzilgan kredit shartnomalari bekor qilinib, murojaatchilarning buzilgan huquqlari tiklangan.
- Avvalroq Andijonda o‘zgalar nomiga onlayn kredit rasmiylashtirgan soxta bankir ushlangani,
- Farg‘onada “betob qizning operatsiyasi uchun” deya o‘zganing nomidan akkaunt ochib, pullarni o‘zlashtirib kelgan shaxs qo‘lga olingani to‘g‘risida xabar berilgandi.
Izoh (0)