Sirdaryo viloyati Xovos tumanida 100 million so‘m imtiyozli kredit ajratib berishni vaʼda qilgan shaxs ushlandi, deb xabar beradi Bosh prokuratura huzuridagi departament.
Qayd etilishicha, departamentning Xovos tuman bo‘limi tomonidan tezkor tadbir o‘tkazilgan. Tadbirda “A.Z.” MCHJ rahbari M.D. (muqaddam firibgarlik jinoyati uchun sudlangan) fuqaro M.X.ning ishonchiga kirib, unga 800 dollar evaziga bank muassasasida ishlovchi tanishlari yordamida 100 million so‘m imtiyozli kredit ajratib berishini aytib, muqaddam 3 million so‘mni qo‘lga kiritib, yana 7,1 million so‘mni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq O‘zbekistonning qator hududlarida kredit pullarini o‘zlashtirganlar ushlangani, Qashqadaryoda kredit mablag‘larini o‘zlashtirgan bank boshqaruvchisi sobiq o‘rinbosari aniqlangani, Farg‘onada 19 nafar fuqaro nomiga avtokredit rasmiylashtirib, ajratilgan mablag‘ni o‘zlashtirgan shaxslar aniqlangani to‘g‘risida xabar berilgandi.
Izoh (0)