Xonanda Davron Ergashev “Daryo”ning YouTube’dagi kanaliga bergan intervyusida nima sababdan AQSHga ketgani, bitta hit qo‘shiq uchun bastakorlarga mashina sovg‘a qilishga tayyorligi va bugungi shou-biznesdan ko‘ngli to‘lmasligi haqida gapirdi.
— AQSHga 2004-yildan buyon boraman. Faqat bu yil ko‘proq u yerda qolganim uchun ko‘pchilik muxlislar AQSHga ko‘chib ketdi, deb o‘ylashibdi. Odatda ijtimoiy tarmoqlardagi izohlarni kuzatmayman. Faqat bir gal “Akamning davrlari o‘tdi-da, shunga ketgan”, deb yozishganini o‘qib qoldim. To‘g‘risi, bu gaplarni o‘qib kuldim. Chunki davrim o‘tganida Amerikaga bormasdim, sanʼatkorlar orasida ko‘p dunyo kezadigani o‘zim bo‘lsam kerak. Sayohat qilishni yaxshi ko‘raman. AQSHga borishimning asosiy sababi farzandlarimning taʼlim olishi bilan bog‘liq.
Yashirmayman, Toshkentdagi to‘ylarda menga talab bor. Shu bois do‘stlarim ham “Nega ketyapsan, bu yerda yaxshi pul topyapsan-ku”, deb hayron bo‘lishgandi. Ko‘pchilik meni Amerikaga ishlashga ketyapti, deb o‘ylashgan ekan. Ammo maqsadim butunlay boshqacha bo‘lgan. Bolalarim uchun hamma narsani tark etoladigan insonman. Bolalarim AQSHdagi maktabda o‘qishadi, katta o‘g‘lim u yerdagi futbol klubi bilan shartnoma imzolash arafasida. O‘zim Toshkentda keldim, ammo oila Amerikada qolgan. U yerda til o‘rganishyapti, to‘g‘ri bu yerda ham kurslarga qatnashsa bo‘lardi. Ammo o‘sha muhitda yashab, til o‘rganishning zavqi baribir boshqacha. Hatto bir necha yil AQSHda yashab, o‘zim ham kundalik so‘zlashuvdagi gaplarni o‘rgandim. Ayrimlar o‘ylaganidek, pulsizlikdan yoki taqiqqa uchraganim uchun ketganim yo‘q. Niyatim — bolalarimni o‘qitish xolos, — deydi Davron Ergashev.
Xonanda AQSHda yashash mashaqqati, ijara uyiga sarflaydigan mablag‘i va pitssaxonada ishlagani haqidagi gap-so‘zlarga oydinlik kiritdi
— Amerikada bir kun ishlamasangiz, oilangizning iqtisodiy ahvoli yomonlashadi. Yaʼni ishlamaslik bu minus degani. Borishingiz bilan darrov shaxsiy uy sotib ololmaysiz. Ko‘pchilik qatori ijara uyga joylashasiz. Masalan, biz ikki xonali uyda turamiz va unga 2150 AQSH dollari ijara puli to‘layman. Bu Pensilvaniyadagi narx, Nyu-Yorkda bundan ham qimmat. Oilamiz uchun har oyda kamida 6 000-7 000 dollar sarflayman.
Odam yangi kiyim olmasa ham ovqat haqida o‘ylaydi. Shu bois u yerda restoran biznesini boshlash haqida o‘ylab qo‘yganman. Muxlislar orasida “Davron Ergashev pitssaxonada ishlayotgan ekan”, degan gap-so‘zlar tarqaldi. Aslida bu shunchaki reklama roligi edi. Meni restoranga ishga taklif qilishdi, ishim juda oddiy, yaʼni kelgan mehmonlarni kutib olishim kerak edi. Ammo tilni yaxshi bilmasligim pand berdi, adashmasam kunlik ish uchun 150 AQSH dollari to‘lashardi. U yerda muqim ish bilan shug‘ullanganim yo‘q, faqatgina onda-sonda to‘ylarga taklif qilishsa bordim xolos, — deydi Davron Ergashev.
Xonanda nega qo‘shiqlari avvalgidek ommalashmayotgani va bugungi shou-biznesdan ko‘ngli to‘lmasligi haqida gapirdi
— Bastakorlardan ko‘p qo‘shiqlar so‘rayman, g‘oyasini ijtimoiy tarmoq orqali yuborishadi. Yoqmaydi, hammasi bir-biriga o‘xshash. Bilmadim, hozir Hamdam Sobirovning uslubi ommalashganmi, jo‘natilayotgan g‘oyalarning hammasi bir xil. Men bu usulda qo‘shiq aytolmayman. Hamdam emas, Davronman deyman. Hatto “Benom” guruhidagi bastakor yigitlarga bitta hit qo‘shiq yozib bersa, bitta mashina sovg‘a qilishim haqida ham aytganman. Ammo jo‘natilgan qo‘shiqlarning hech biriga ko‘nglim jiz etmaydi. Shahnozning ham oxirgi ijodi yoqmadi.
Bugungi kundagi shou-biznesdan ko‘nglim to‘lmaydi. Kirdi-chiqdi xonandalar ko‘payib ketgan, keyin o‘ziga xoslik yo‘qolgan. Balki, bu xonandalarning ko‘pligi bilan bog‘liqdir, bilmadim, — deydi xonanda Davron Ergashev.
Suhbatni to‘liq holda quyidagi havola orqali tomosha qilishingiz mumkin.
Izoh (0)