Xonanda Davron Ergashev ayni paytda oilasi bilan Amerika Qo‘shma Shtatlarida istiqomat qilmoqda. U “Daryo” muxbiri bilan suhbatda Amerikaga nima sababdan ketgani, u yerdagi hayotning afzalliklari hamda kamchiliklari haqida so‘zlab berdi.
“Bu yerda til o‘rganish osonroq”
Ayni paytda oilamiz bilan AQSHning Pensilvaniya shtati Filadelfiya shahrida yashayapmiz. Ko‘pchilik ‘Butunlayga ketdingizmi?' deb so‘rayapti. Yo‘q, butunlayga kelmadim. Farzandlarimni shu yerda o‘qitib, til o‘rgatishni maqsad qilganman. Bu yerda til o‘rganish osonroq. Farzandlarim hozirda maktabda o‘qishmoqda. O‘zimning ham shu yerda ijod qilib, kliplar olish niyatim bor. Lekin bu yerga asosan farzandlarim uchun keldim. Har bir ota-ona farzandining sifatli ta’lim olishi uchun sharoit yaratib bergisi keladi. Vaqti kelib Toshkentga qaytamiz, inshaolloh.
“O‘zbekistondagi yaxshi ishingizni tashlab Amerikaga ketdingizmi, deb so‘rashyapti. Yashirmayman, O‘zbekistonda ishim zo‘r, Allohga shukur. Muxlislarim haligacha yozishadi. ‘Aka, to‘yimga sizni chaqirishni niyat qilganman’, deyishadi. Ularga Amerikaga bir umrga ketmaganimni aytyapman. To‘ylarga borib, kelib, hozircha ikki davlat o‘rtasida yashaymiz.
“Amerikaga kelish ko′pchilikning orzusi”
Amerikaga borib o‘qib, ishlashni ko‘pchilik orzu qiladi. Aytishadiku, “Amerika sehrli diyor”, deb. Amerikaga yurtdoshlarimiz asosan Green Card bilan kelishadi. Ularning orasida, ayniqsa samarqandliklar ko‘p. O‘zim ham qanday qilib Green Card’ni yutishlariga qiziqib ularga savol berdim. Aytishlaricha, ularda viloyat bo‘yicha hamma butun oila a’zolari bilan, uyma-uy o‘ynashar ekan. Shuning uchun samarqandliklar Green Card lotereyasida O‘zbekistondagi boshqa viloyatlarga qaraganda ko‘proq yutisharkan. Masalan, Toshkentda hamma yoppasiga o‘ynamaydi, shuning uchun kamdan kam hollarda yutishadi. O‘zimga kelsam, oilamiz bilan hammamizga turistik viza taqdim etildi, shuning uchun kelib ma’lum muddat bu yerda yashab ko‘rishga qaror qildik.
Amerikadagi hayotning afzalliklari haqida
“Amerikada hayot juda ham go‘zal. Biroq hech qayer o‘z Vataningizga yetmaydi. Bir narsani alohida ta’kidlashim kerak, bu yerda havo nihoyatda toza. Filadelfiyada o‘rmon, archazor, daraxtzorlar ko‘p bo‘lgani uchun havo tozaligi yaqqol seziladi. Bahorda bu yerlar juda go‘zal bo‘lar ekan, hammayoq yam-yashil. Hattoki, to‘g‘risini aytsam bu yerda chang degan narsa yo‘q, havosi original. Oilamga, farzandlarimga bu shahar judayam yoqdi, yaxshi yashayapmiz, Xudoga shukur.
Begona davlatda yashashning o‘ziga yarasha qiyinchiliklari ham bo‘ladi albatta. Ularga sabr bilan chidayapmiz. Bu birinchi o‘rinda Vatan, ota-onamiz va jigarlarimiz sog‘inchi, qolaversa o‘zimning haqiqiy shinavanda muxlislarimni sog‘indim. Borib ijod qilgim kelyapti. Yaxshi qo‘shiqlar yozganmiz. Yozda ularga Mayamida kliplar olishni niyat qilganman. 2002-yilda Shahnoz bilan kuylagan ‘Seni ko‘rsam qaniydi?’, deb nomlangan duetimizning o‘zim aytgan qismini boshqatdan ijro etdim. Ushbu yangilik muxlislarimga manzur bo‘ladi, degan umiddaman. O‘sha qo‘shiqqa yangi klip ham olinadi. Muxlislarim ijodni yig‘ishtirdingizmi, deb ham savol berishyapti. Yo‘q, san’atni to‘xtatganim yo‘q. Xudo xohlasa O‘zbekistonga borib, muxlislarimizga yangi ijod namunalarini taqdim etaman.
Izoh (0)