Xonanda Davron Ergashev “Demokrat.uz” YouTube kanaliga bergan intervyusida o‘g‘lini Amerikada uylantirish, qiz tanlash jarayoni qanday kechgani haqida so‘zlab berdi.
— 20 yildan beri Amerikaga borib-kelib yuraman. Sayyoh sifatida asosan. Bu safar farzandlarim uchun o‘sha yerda yashadim. Shu borganimda o‘g‘limni uylantirishga ham ulgurdim. Biz AQSHning Pensilvaniya shahrida yashaymiz. Kelinimiz esa Amerikaning narigi chekkasida — Kaliforniyaning Sakramento shahridan. O‘zi asli toshkentlik, Yunusobod tumanidan. Kelin qilishimiz ham rosa qiziq bo‘ldi. O‘g‘lim ikkalamiz Amerikaga borib, oilamiz uchun sharoit qilib, keyin uydagilarni olib ketishni rejalashtirgandim. O‘g‘limni uylantirish xayolimda ham yo‘q edi. Shunday paytda aktyor ukamiz Sherzod Bin “Aka, o‘g‘lingizga, oilangizga mos bir qiz bor”, deb qoldi. Unchalik e’tibor bermadim. Chunki o‘g‘lim hali 20 yosh, hech bo‘lmasa 24 yosh bo‘lsin, deb o‘ylab yurardim. Bir kuni ukam “Sherzodning gapiga e’tiborsiz bo‘ldingiz, shu qizni qo‘ldan chiqarmaylik”, deb qoldi. Shu gap bilan o‘g‘limni olib, qizning oilasi bilan gaplashib Kaliforniyaga sovchilikka bordik. Yoshlar bir-birini ko‘rdi. Ma’qul bir-biriga bo‘ldi. Uydagilarni chaqirdim, shu bilan to‘y bo‘lib ketdi. Sherzod Bin sabab bo‘ldi.
O‘g‘lim futbolchi. Shu yerda ham kichkinaligidan “Bunyodkor” futbol klubida o‘ynagan. Hozir hujjatlari chiqquncha Uber’da ishlab turibdi. Hujjatlari chiqqach, “Orlando City” futbol klubida o‘ynashni boshlaydi.
Xonanda shuningdek, Amerikada haydovchilarning madaniyatiga qoyil qolgani haqida ham gapirib o‘tdi.
— Men o‘zimizni yomonlamoqchi emasman. Lekin Amerikada haydovchilarning madaniyatiga qoyil qoldim. Hamma qoidaga amal qilib, chiziqlarga qarab haydaydi. Signal ovozini umuman eshitmaysiz. Amerikadagi apartamentimiz katta yo‘lni ustida joylashgan. Kichkina o‘g‘lim uyni oldida futbol o‘ynayotganida gohida koptok yo‘lga chiqib ketadi. U koptogini olgunicha mashinalar to‘xtab, kutib turadi. 20-30 ta mashina bo‘lib ketsa ham hech kim signal bermaydi. Mana, hozir Toshkentga qaytib, ko‘chada yuribman. Yo‘llardagi vaziyatga hech ko‘nika olmayapman. Haydovchilar har tomonimdan siqib o‘tib ketishlarini hazm qilolmayapman.
Lekin amerikaliklarning ham bizga havas qiladigan joylari bor. Masalan, qo‘limizni yuvib, keyin ovqatlanishimiz yoki taomlanib bo‘lgach, duo qilib dasturxondan turishimizga ular havas qiladi.
Davron Ergashev Amerikada nima ish bilan tirikchilik qilayotganiga ham oydinlik kiritdi.
— Amerikada to‘ylar O‘zbekistondagidek ko‘p emas. Shuning uchun o‘sha yerda tadbirkorlik qilayotgan ukalarimiz restoran yoki kafesini reklama qilib berishimni so‘radi. Summasini kelishib, reklamaga tushib berdim. Ko‘pchilik o‘sha videodan keyin meni pitssaxonada ishlayapti, deb o‘ylayapti. Aslida esa bu shunchaki reklama edi. To‘ylarga ham chaqirib turishibdi. Masalan, Nyu Jersi shtatiga ashaddiy muxlislarimdan biri to‘yga chaqirdi. 1 soatga 1,5 ming dollarga kelishib bordim. Ular “Mario” ni yaxshi ko‘rarkan. Shu qo‘shiqni 6 martacha aytib berdim. To‘ydan 10 ming dollardan ortiq pul tushdi.
Izoh (0)