Aktyor Deniel Redkliff kino va teatr faoliyatidagi birinchi “Toni” mukofotiga sazovor bo‘ldi. Sovrin “Merrily We Roll Along” (Xursandchilik bilan olg‘a boramiz) musiqiy spektaklidagi eng yaxshi erkak roli uchun topshirildi. Bu haqda “Pravila jizni” nashri xabar berdi.
“Toni” — Amerika teatri, shu jumladan, musiqali teatr sohasidagi yutuqlar uchun har yili beriladigan mukofot bo‘lib, asosan Brodvey (Nyu York)da qo‘yiladigan spektakllar uchun topshiriladi.
“Garri Potter” franshizasi tugagach, kino sohasidagi karyeram qanday davom etishini tasavvur ham qila olmas edim. So‘ng teatrga kirib keldim va spektakllarda rol o‘ynay boshladim. Ammo kelajakda meni nimalar kutayotganini bilmas edim, — deydi aktyor.
O‘tgan yili men “Wird Al” spektaklida ishtirok etdim, bu ajoyib tajriba edi, — deya davom etdi Redkliff.
Aktyorning so‘zlariga ko‘ra, doimiy bir xil obrazni uzoq yillar davomida gavdalantirish noto‘g‘ri bo‘lgan. Deniel doim boshqa loyihalarda ishtirok etishni va o‘zini turli janrlarda sinab ko‘rishni istagan.
Mukofotni qo‘lga olar ekan, aktyor ota-onasiga, rafiqasi Erin Darkka, o‘g‘li Jonga, shuningdek, spektakl jamoasiga o‘z minnatdorchiligini bildirdi.
“Merrily We Roll Along” musiqiy asari 1934-yilda Jorj Kaufman va Moss Xartning xuddi shu nomli pyesasi asosida yaratilgan. Musiqali teatrda uch nafar yigitning do‘stligi yigirma yil davomida qanday rivojlanib kelgani haqida hikoya qilinadi. Voqealar rivoji teskari xronologiyada yoritiladi.
Mazkur spektakl London va Nyu Yorkda bo‘lib o‘tgan va bugungi kunda Brodveyning Gudzon teatrida namoyish etilmoqda. “Merrily We Roll Along”ning namoyishi joriy yil 7-iyul kunigacha davom etadi.
Izoh (0)