Хонанда Даврон Эргашев “Дарё”нинг YouTube’даги каналига берган интервьюсида нима сабабдан АҚШга кетгани, битта ҳит қўшиқ учун бастакорларга машина совға қилишга тайёрлиги ва бугунги шоу-бизнесдан кўнгли тўлмаслиги ҳақида гапирди.
— АҚШга 2004 йилдан буён бораман. Фақат бу йил кўпроқ у ерда қолганим учун кўпчилик мухлислар АҚШга кўчиб кетди, деб ўйлашибди. Одатда ижтимоий тармоқлардаги изоҳларни кузатмайман. Фақат бир гал “Акамнинг даврлари ўтди-да, шунга кетган”, деб ёзишганини ўқиб қолдим. Тўғриси, бу гапларни ўқиб кулдим. Чунки даврим ўтганида Америкага бормасдим, санъаткорлар орасида кўп дунё кезадигани ўзим бўлсам керак. Саёҳат қилишни яхши кўраман. АҚШга боришимнинг асосий сабаби фарзандларимнинг таълим олиши билан боғлиқ.
Яширмайман, Тошкентдаги тўйларда менга талаб бор. Шу боис дўстларим ҳам “Нега кетяпсан, бу ерда яхши пул топяпсан-ку”, деб ҳайрон бўлишганди. Кўпчилик мени Америкага ишлашга кетяпти, деб ўйлашган экан. Аммо мақсадим бутунлай бошқача бўлган. Болаларим учун ҳамма нарсани тарк этоладиган инсонман. Болаларим АҚШдаги мактабда ўқишади, катта ўғлим у ердаги футбол клуби билан шартнома имзолаш арафасида. Ўзим Тошкентда келдим, аммо оила Америкада қолган. У ерда тил ўрганишяпти, тўғри бу ерда ҳам курсларга қатнашса бўларди. Аммо ўша муҳитда яшаб, тил ўрганишнинг завқи барибир бошқача. Ҳатто бир неча йил АҚШда яшаб, ўзим ҳам кундалик сўзлашувдаги гапларни ўргандим. Айримлар ўйлаганидек, пулсизликдан ёки тақиққа учраганим учун кетганим йўқ. Ниятим — болаларимни ўқитиш холос, — дейди Даврон Эргашев.
Хонанда АҚШда яшаш машаққати, ижара уйига сарфлайдиган маблағи ва пиццахонада ишлагани ҳақидаги гап-сўзларга ойдинлик киритди
— Америкада бир кун ишламасангиз, оилангизнинг иқтисодий аҳволи ёмонлашади. Яъни ишламаслик бу минус дегани. Боришингиз билан дарров шахсий уй сотиб ололмайсиз. Кўпчилик қатори ижара уйга жойлашасиз. Масалан, биз икки хонали уйда турамиз ва унга 2150 АҚШ доллари ижара пули тўлайман. Бу Пенсилваниядаги нарх, Нью-Йоркда бундан ҳам қиммат. Оиламиз учун ҳар ойда камида 6 000-7 000 доллар сарфлайман.
Одам янги кийим олмаса ҳам овқат ҳақида ўйлайди. Шу боис у ерда ресторан бизнесини бошлаш ҳақида ўйлаб қўйганман. Мухлислар орасида “Даврон Эргашев пиццахонада ишлаётган экан”, деган гап-сўзлар тарқалди. Аслида бу шунчаки реклама ролиги эди. Мени ресторанга ишга таклиф қилишди, ишим жуда оддий, яъни келган меҳмонларни кутиб олишим керак эди. Аммо тилни яхши билмаслигим панд берди, адашмасам кунлик иш учун 150 АҚШ доллари тўлашарди. У ерда муқим иш билан шуғулланганим йўқ, фақатгина онда-сонда тўйларга таклиф қилишса бордим холос, — дейди Даврон Эргашев.
Хонанда нега қўшиқлари аввалгидек оммалашмаётгани ва бугунги шоу-бизнесдан кўнгли тўлмаслиги ҳақида гапирди
— Бастакорлардан кўп қўшиқлар сўрайман, ғоясини ижтимоий тармоқ орқали юборишади. Ёқмайди, ҳаммаси бир-бирига ўхшаш. Билмадим, ҳозир Ҳамдам Собировнинг услуби оммалашганми, жўнатилаётган ғояларнинг ҳаммаси бир хил. Мен бу усулда қўшиқ айтолмайман. Ҳамдам эмас, Давронман дейман. Ҳатто “Беном” гуруҳидаги бастакор йигитларга битта ҳит қўшиқ ёзиб берса, битта машина совға қилишим ҳақида ҳам айтганман. Аммо жўнатилган қўшиқларнинг ҳеч бирига кўнглим жиз этмайди. Шаҳнознинг ҳам охирги ижоди ёқмади.
Бугунги кундаги шоу-бизнесдан кўнглим тўлмайди. Кирди-чиқди хонандалар кўпайиб кетган, кейин ўзига хослик йўқолган. Балки, бу хонандаларнинг кўплиги билан боғлиқдир, билмадим, — дейди хонанда Даврон Эргашев.
Суҳбатни тўлиқ ҳолда қуйидаги ҳавола орқали томоша қилишингиз мумкин.
Изоҳ (0)