Parijning Monten avenyusida joylashgan Chanel do‘konida yirik o‘g‘rilik sodir bo‘ldi. Bu haqda France 24 nashri xabar berdi.
Jinoyatchilar avtomashina yordamida do‘kon oynasini sindirib, ichkariga kirgan. Shundan so‘ng ular tovarlarni olib, boshqa mashinada qochib ketishgan va birinchi avtomobilni yoqib yuborishgan.
France 24 telekanali maʼlumotlariga ko‘ra, gumonlanuvchilar hamon ozodlikda, talonchilikdan ko‘rilgan zarar esa olti milliondan o‘n million yevrogacha baholanmoqda. Telekanalning politsiyadagi manbasi zararni bartaraf etish uchun do‘kon bir necha kunga yopilishini ma’lum qilgan. Do‘kon xodimlaridan hech kim jabrlanmagan.
Bu so‘nggi haftalarda ushbu ko‘chadagi hashamatli do‘konlarga uyushtirilgan ikkinchi talonchilik jinoyati hisoblanadi. Avvalroq jinoyatchilar Garri Uinston do‘konini tunab, bir necha million yevrolik zargarlik buyumlari bilan mototsiklda qochib ketgan. Mazkur ish yuzasidan tergov hamon davom etayotgani aytilgan.
Izoh (0)