HAMAS Birlashgan Millatlar Tashkiloti Xavfsizlik kengashining G‘azoda doimiy o‘t ochishni to‘xtatishga chaqiruvchi rezolyutsiyasini olqishlashini bildirdi.
HAMAS G‘azodan qo‘shinlarni to‘liq olib chiqish, asirlarni almashish, ko‘chirilganlarni o‘z yashash joylariga qaytarish, har qanday demografik o‘zgarishlarni yoki hududni qisqartirish kabi choralarni rad etishni, g‘azoliklarga zarur yordam ko‘rsatishni olqishlaydi, — deyiladi bayonotda.
Shuningdek, guruh xalq talablari va qarshiliklariga mos keladigan ushbu tamoyillarni amalga oshirish bo‘yicha bilvosita muzokaralar olib borish uchun hamkorlik qilishga tayyorligini ta’kidlagan.
Avvalroq BMT Xavfsizlik kengashi G‘azo sektorida o‘t ochishni to‘xtatish va garovdagilarni ozod etish bo‘yicha AQSH rezolyutsiyasini qo‘llab-quvvatlagandi.
Xavfsizlik kengashining 15 a’zosidan 14 nafari hujjatga ovoz bergan, Rossiya esa betaraf qolgan. AQSH taklif qilgan rezolyutsiya yetti banddan iborat bo‘lib, ulardan birinchisi HAMASni kelishuvni qabul qilishga hamda “barcha tomonlarni uning qoidalarini hech qanday shartlarsiz to‘liq bajarishga chaqiradi”.
AQSHning otashkesim rejasi
31-may kuni AQSH prezidenti Jo Bayden uch bosqichdan iborat yangi tinchlik bitimi loyihasi shartlarini e’lon qildi. Birinchisi olti haftaga mo‘ljallangan bo‘lib, to‘liq o‘t ochishni to‘xtatish, Isroil qo‘shinlarini G‘azoning aholi punktlaridan olib chiqib ketish, yuzlab falastinlik mahbuslarni qamoqdan ozod qilish evaziga HAMAS tomonidan garovga olinganlarni ozod etishni nazarda tutadi.
Shuningdek, ushbu davrda tomonlar muzokaralarni boshlashlari kerak va o‘zaro kelishuvga erishilgunga qadar sulh o‘z kuchida qoladi. Ikkinchi bosqich barcha garovga olinganlarni, jumladan, harbiy xizmatchilarni ham ozod qilishni nazarda tutadi. Uchinchi bosqichda G‘azo sektorini tiklash va halok bo‘lgan isroilliklarning jasadlarini yaqinlariga topshirish ko‘zda tutilgan.
Izoh (0)