O‘zbekiston 2023-yilda 65 ta mamlakatga to‘qimachilik mahsulotlarini eksport qildi

Makroiqtisodiy va hududiy tadqiqotlar instituti mutaxassislari O‘zbekistonning 2017-2023-yillardagi eksport geografiyasini tahlil qildi.

O‘zbekistondan tovarlar va xizmatlar eksport qilinadigan davlatlar soni va mahsulotlar turi tobora ortib bormoqda. 2017-yilda jami 12,55 mlrd dollar mahsulot va xizmatlar eksport qilingan bo‘lsa, 2023-yilga kelib bu ko‘rsatkich 1,95-marta ko‘payib, 24,43 mlrd dollarni tashkil qildi. 2023-yilda eksportning yillik o‘sish surʼati 23,8 foizini tashkil qildi.

2017–2023-yillar mobaynida mamlakatning eksport geografiyasi 14 ta mamlakatga kengaydi, hozirda mahsulotlar har biri 10 ming dollar ortiq bo‘lgan 122 ta mamlakatga eksport qilinmoqda.

Eksport qilinadigan mahsulotlar diversifikatsiyasi oshib bormoqda, jumladan, TIF TN 10 ta belgisi bo‘yicha tovar nomenklaturasida 2017-yilda har biri 10 ming dollar ortiq bo‘lgan 1219 xil mahsulotlar eksport qilingan bo‘lsa, 2023-yilga kelib bu ko‘rsatkich 2874 tani tashkil qildi (2,4 marta ko‘p).

2017-2023-yillarda paxtadan tayyorlangan yuqori qo‘shilgan qiymatli tovarlar eksporti yo‘lga qo‘yildi. Xususan, 2017-yilda to‘qimachilik mahsulotlari umumiy eksportning 8,1 foizini tashkil etgan bo‘lsa, 2023-yilda ushbu ko‘rsatkich 12,5 foizini tashkil qilib, 65 ta mamlakatga 639 turdagi to‘qimachilik mahsulotlari eksporti amalga oshirishga erishildi.