“Respublikada to‘qimachilik, charm-poyabzal va elektrotexnika mahsulotlari eksportini tartibga solish chora-tadbirlari to‘g‘risida”gi Vazirlar Mahkamasi qarori qabul qilindi.
To‘qimachilik, charm-poyabzal va elektrotexnika mahsulotlari uchun eksport narxlari shakllantirilishi ustidan nazoratni taʼminlash maqsadida 2024-yil 15-maydan boshlab belgilangan tartibda tasdiqlangan ro‘yxat bo‘yicha respublikadan eksport qilinadigan to‘qimachilik, charm-poyabzal va elektrotexnika mahsulotlari bo‘yicha shartnomalar qiymatini monitoring qilish hamda eksport narxlari shakllantirilishi ustidan nazorat o‘rnatiladi.
Minimal eksport narxlari belgilanadigan to‘qimachilik, charm-poyabzal va elektrotexnika mahsulotlari ro‘yxati SSP, Investitsiyalar, sanoat va savdo vazirligi hamda “O‘zto‘qimachiliksanoat”, “O‘zcharmsanoat” va “O‘zeltexsanoat” uyushmalari takliflariga asosan Investitsiyalarni jalb qilish, sanoatni rivojlantirish va savdoni tartibga solish bo‘yicha hukumat komissiyasi tomonidan tasdiqlanadi.
Ro‘yxatga kiritilgan to‘qimachilik, charm-poyabzal va elektrotexnika mahsulotlari uchun minimal eksport narxlari har oyda ichki va tashqi bozor konyunkturasi tahlili asosida shakllantiriladi hamda tasdiqlanadi. Zarur hollarda, ular oy davomida qayta qo‘rib chiqilishi mumkin.
To‘qimachilik, charm-poyabzal va elektrotexnika mahsulotlari minimal eksport narxlari bo‘yicha maʼlumotlar SSP tomonidan tashqi savdo operatsiyalarining yagona elektron axborot tizimiga kiritiladi va SSP, “O‘zto‘qimachiliksanoat”, “O‘zcharmsanoat” va “O‘zeltexsanoat” uyushmalari rasmiy saytlarida eʼlon qilib boriladi.
Bunda, ro‘yxatga kiritilgan to‘qimachilik, charm-poyabzal va elektrotexnika mahsulotlari uchun minimal eksport narxlari eʼlon qilingan kundan eʼtiboran ikki ish kuni o‘tgach amalga kiritiladi. SSP doimiy ravishda bojxona organlarining axborot tizimiga minimal eksport narxlari bo‘yicha maʼlumotlar onlayn tarzda taqdim etib borilishini taʼminlashi kerak.
To‘qimachilik, charm-poyabzal va elektrotexnika mahsulotlarining eksport narxlari minimal eksport narxlaridan pasaytirilganligi holati aniqlaganda, Soliq qo‘mitasi va Bosh prokuratura huzuridagi Iqtisodiy jinoyatlarga qarshi kurashish departamenti tomonidan qonunchilikka muvofiq choralar ko‘riladi.
Hujjat Qonun hujjatlari maʼlumotlari milliy bazasida eʼlon qilingan va 2024-yil 13-maydan kuchga kirdi.
Eslatib o‘tamiz, 2023-yil oktyabr oyida prezident qarori bilan charm-poyabzal va mo‘ynachilik sohasida eksport qiluvchi korxonalarni yanada qo‘llab-quvvatlash maqsadida O‘zbekistonning bojxona chegarasi orqali mayda shoxli molning yarim tayyor charmini olib chiqishda 2025-yil 1-yanvarga qadar yig‘im undirilmasligi belgilangan.
Izoh (0)