O‘zbekistonda to‘qimachilik va tikuv-trikotaj sanoatini rivojlantirishni yangi bosqichga olib chiqish chora-tadbirlari to‘g‘risida prezident farmoni imzolandi.
Hujjatga ko‘ra, gazlama, trikotaj mato ishlab chiqarish va bo‘yash hajmini oshirish uchun infratuzilmaviy va moliyaviy shart-sharoitlar yaratish orqali ip-kalavani qayta ishlash darajasini 2027-yil yakuniga qadar bosqichma-bosqich 100 foizga olib chiqish rejalashtirilgan.
Dastlabki bosqichda to‘qimachilikka ixtisoslashgan Andijon va Namangan viloyatlaridagi kichik sanoat zonalari hamda Toshkent viloyatidagi industrial texnopark to‘liq infratuzilma bilan ta’minlanadi.
Shu jumladan, suv tozalash inshootlarini qurish ishlarini 2024-yil yakuniga qadar yakunlash, shuningdek, ularda gazlama, trikotaj mato va tayyor mahsulotlarni ishlab chiqarish va bo‘yash uchun zarur bino va inshootlarni tadbirkorlarning talablari va loyihalari asosida qurib, tayyor holatda bo‘lib-bo‘lib to‘lash sharti bilan yoki ijara asosida berish imkoniyati yaratiladi.
Farmonda belgilanishicha, to‘qimachilik va tikuv-trikotaj sanoati loyihalari uchun tijorat banklarida ochilgan 12 million dollar miqdoridagi kredit liniyalari hamda ajratilishi nazarda tutilgan 100 million dollar miqdoridagi mablag‘lar Investitsiyalarni jalb qilish, sanoatni rivojlantirish va savdoni tartibga solish masalalari bo‘yicha hukumat komissiyasi qaroriga asosan qayta taqsimlanadi.
Belgilansishicha, 2024-yil 1-maydan boshlab 2026-yil 1-mayga qadar “A” va undan yuqori toifadagi to‘qimachilik va tikuv-trikotaj yo‘nalishidagi tadbirkorlik subyektlari faoliyatida soliq tekshiruvlari o‘tkazilmaydi (jinoiy ishlar doirasida o‘tkaziladigan tekshiruvlar bundan mustasno).
Shuningdek, ushbu toifadagi tadbirkorlik subyektlariga qo‘shilgan qiymat solig‘i summasi o‘rnini qoplash (qaytarish) bir kun muddatda tekshiruvlarsiz amalga oshiriladi.
2026-yil 1-yanvarga qadar to‘qimachilik sanoat zonalari direksiyalari va ularda tashkil etiladigan korxonalar mol-mulk solig‘i, yer solig‘i va suv resurslaridan foydalanganlik uchun soliqdan ozod etiladi.
Hujjatda respublikani “to‘qimachilik xabi”ga aylantirish va kamida xalqaro darajada tan olingan 10 ta mahalliy brendlarni yaratish ustida ishlarni manzilli tashkil etish ham belgilangan.
Izoh (0)