Ўзбекистон 2023 йилда 65 та мамлакатга тўқимачилик маҳсулотларини экспорт қилди

Макроиқтисодий ва ҳудудий тадқиқотлар институти мутахассислари Ўзбекистоннинг 2017-2023 йиллардаги экспорт географиясини таҳлил қилди.

Ўзбекистондан товарлар ва хизматлар экспорт қилинадиган давлатлар сони ва маҳсулотлар тури тобора ортиб бормоқда. 2017 йилда жами 12,55 млрд доллар маҳсулот ва хизматлар экспорт қилинган бўлса, 2023 йилга келиб бу кўрсаткич 1,95 марта кўпайиб, 24,43 млрд долларни ташкил қилди. 2023 йилда экспортнинг йиллик ўсиш суръати 23,8 фоизини ташкил қилди.

2017–2023 йиллар мобайнида мамлакатнинг экспорт географияси 14 та мамлакатга кенгайди, ҳозирда маҳсулотлар ҳар бири 10 минг доллар ортиқ бўлган 122 та мамлакатга экспорт қилинмоқда.

Экспорт қилинадиган маҳсулотлар диверсификацияси ошиб бормоқда, жумладан, ТИФ ТН 10 та белгиси бўйича товар номенклатурасида 2017 йилда ҳар бири 10 минг доллар ортиқ бўлган 1219 хил маҳсулотлар экспорт қилинган бўлса, 2023 йилга келиб бу кўрсаткич 2874 тани ташкил қилди (2,4 марта кўп).

2017-2023 йилларда пахтадан тайёрланган юқори қўшилган қийматли товарлар экспорти йўлга қўйилди. Хусусан, 2017 йилда тўқимачилик маҳсулотлари умумий экспортнинг 8,1 фоизини ташкил этган бўлса, 2023 йилда ушбу кўрсаткич 12,5 фоизини ташкил қилиб, 65 та мамлакатга 639 турдаги тўқимачилик маҳсулотлари экспорти амалга оширишга эришилди.