AQSH Adliya vazirligi marixuanani o‘ta kuchli bo‘lgan giyohvand moddalar toifasidan (DEA ro‘yxati) olib tashlashga qaror qildi. Bu haqda Reuters xabar berdi.
Bugungi kunda Qo‘shma Shtatlarda marixuanadan foydalanganlik uchun jazo geroin yoki LSD kabi og‘ir giyohvand moddalarni iste’mol qilganlik uchun jazo bilan taqqoslanadi. Adliya departamenti bosh prokurori Merrik Garlandning tavsiyasiga ko‘ra, marixuanani ketamin, taylenol va kodeinni o‘z ichiga olgan jismoniy va psixologik qaramlik ehtimoli o‘rtacha yoki past bo‘lgan dorilar ro‘yxatiga o‘tkazish niyatida.
Adliya vazirligining taklifi allaqachon ko‘rib chiqish va takomillashtirish uchun Oq uyga taqdim etilgan. AQSH prezidenti Jo Bayden birinchi bo‘lib marixuana tasnifini qayta ko‘rib chiqish tashabbusi bilan chiqqan. Narkotik moddani qayta tasniflash uning 2020-yilgi saylovoldi va’dalaridan biri bo‘lgan.
Qo‘shma Shtatlarda marixuanadan foydalanish va unga egalik qilish federal darajada taqiqlangan. Biroq, preparat 40 shtatda qonuniydir va kannabidiol (nasha o‘simliklarida topilgan tabiiy birikma)ni o‘z ichiga olgan dorilar Qo‘shma Shtatlarda surunkali og‘riq yoki tutqanoqdan aziyat chekuvchi bemorlarni davolash uchun buyuriladi.
Marixuanani qonuniylashtirish bo‘yicha jamoatchilik tomonidan qo‘llab-quvvatlovchi voyaga yetganlar soni 1995-yildagi 25 foizdan 2023-yilda 70 foizga oshgan.
Marixuanani qayta tasniflash uni qonuniylashtirmaydi, ammo bu ko‘proq tadqiqot va tibbiyotda foydalanish eshiklarini ochadi, jinoiy jazolarni kamaytiradi va nasha sektoriga xususiy investitsiyalarni oshiradi, — deydi Reuters.
Izoh (0)