Xitoy va Pokiston qo‘shma bayonot eʼlon qilib, “Tolibon”ni inklyuziv hukumat tuzishga va terrorizmga qarshi kurashishga chaqirdi. Bu haqda Hasht-e Subh Daily nashri xabar berdi.
Manbada aytilishicha, Pokiston bosh vaziri Shahboz Sharifning Xitoyga to‘rt kunlik tashrifi davomida bayonot eʼlon qilingan. Pokiston va Xitoyning “Tolibon” hukumatiga talablari umumiy ekanligi aytilgan.
Ikki tomon qo‘shma bayonotda “Tolibon”dan mo‘tadil siyosat olib borish orqali qo‘shnilarini hurmat qilishni so‘ragan. Mamlakatlar bilan harbiy harakatlardan qochish va kuchga tayanmaslik so‘ralgan.
Ushbu bayonotning bir qismida terroristik guruhlar “Tolibon” hukmronligi ostidagi hududdan boshqa davlatlarga qarshi hujumlarini uyushtirmasliklari kerakligi qayd etilgan. Taqiqlangan xalqaro tashkilotlarga boshpana bermaslik so‘ralgan.
Tomonlar, shuningdek, 2024-yil 26-mart kuni Pokistonning Xayber-Paxtunxva viloyatida xitoylik muhandislar karvoniga uyushtirilgan hujumni qoralab, ikki davlat o‘rtasidagi munosabatlarni zaiflashtirishga qaratilgan har qanday urinish behuda bo‘lishini qo‘shimcha qilgan. Pekin va Islomobod terrorizmga qarshi birgalikdagi hamkorlikni yana bir bor taʼkidlab, bu borada xalqaro hamjamiyat bilan hamkorlik qilishga tayyor ekanliklarini maʼlum qilgan.
Maʼlumot o‘rnida, Islomoboddagi hukumat “Tolibon”ni “Tahriki Tolibon” guruhi tomonidan Pokistonga uyushtirilgan teraktlarni qo‘llab-quvvatlashda ayblab keladi. Pokiston, shuningdek, “Tolibon”ga bo‘ysunuvchi “Haqqoniy tarmog‘i” guruhini ISHID bilan aloqa o‘rnatishda ayblagan.
Izoh (0)