Qoraqalpog‘istonning To‘rtko‘l tumani va Xorazm viloyatining Urganch tumanida qalbaki aksiz markali alkogol mahsulotlarini muomalaga kiritilishining oldi olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, departamentning Urganch tuman bo‘limi tomonidan o‘tkazilgan tergovga qadar tekshiruvda “M.O.” MCHJga qarashli savdo shoxobchasida jami 742 dona “Lyuks Santal” va “Russkiy” nomli qalbaki aksiz markali alkogol mahsulotlari sotuvga qo‘yilganligi aniqlanib, ushbu mahsulotlar ashyoviy dalil sifatida olingan.
Shu kabi departamentning To‘rtko‘l tuman bo‘limi tomonidan o‘tkazilgan tezkor tadbirda Beruniy ko‘chasida joylashgan do‘kon sotuvchisi I.Sh. 4 dona “Qaratau” nomli isteʼmolga yaroqsiz qalbaki aksiz markali alkogol mahsulotini sotgan vaqtida ushlanib, ushbu do‘kondan 16 turdagi jami 146 dona qo‘lbola usulda tayyorlangan qalbaki aksiz markali alkogol mahsulotlari ashyoviy dalil tariqasida olingan.
Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)