AQSH harbiylari 9-iyun kuni G‘azoga havodan gumanitar yordam dasturini qayta ishga tushirdi. Bu haqda Al-Arabiya nashri xabar berdi.
Manbada aytilishicha, yakshanba kuni AQSH harbiy samolyotlari G‘azoga 10 tonnadan ortiq gumanitar yordam jamlanmalari tashlagan. So‘nggi marta bu tarzdagi yordam 2 oy oldin yetkazib berilgan.
Hozirda G‘azo sektoriga quruqlikdan yordam olib kirish Isroil cheklovlari tufayli imkonsiz deb baholangan. Dengizdan yordam olib kirish uchun mo‘ljallangan ko‘chma port esa noqulay ob-havo sharoiti tufayli ishdan chiqqani xabar berilgan.
AQSh Markaziy qo‘mondonligi (CENTCOM) bayonotida aytilishicha, havodan tashlangan gumanitar yordam paketlari G‘azo shimoliga insonparvarlik yordamining bir qismidir. Agar quruqlik va dengizda yordam jo‘natishga monelik qiluvchi omillar davom etsa, Vashington havodan uzluksiz taʼminot yuborishga o‘tadi.
“Ushbu havodan yordam yuklari doimiy saʼy-harakatlarning bir qismidir va biz uni rejalashtirishda davom etamiz”, — deb qo‘shimcha qilgan CENTCOM.
Rasmiylar hozirda Yaqin Sharqning Iordaniya, Qatar va Misr kabi davlatlari faol tarzda G‘azoga havodan yordam dasturini amalga oshirayotganini bildirgan.
Izoh (0)