Saudiya Arabistoni xavfsizlik kuchlari kelasi hafta boshlanadigan haj ziyorati oldidan Makkadan ro‘yxatdan o‘tmagan 300 mingdan ortiq ziyoratchini chiqarib yubordi. Bu haqda Saudia Press Agency xabar berdi.
So‘nggi kunlarda muqaddas shahardan chiqarib yuborilganlar orasida haj uchun zarur bo‘lgan vizalar o‘rniga turistik vizalar bilan kelgan 153 998 nafar xorijlik bor. Qirollik Saudiyada istiqomat qiluvchi, lekin Makkada istiqomat qilmaydigan va hajga ruxsatnomaga ega bo‘lmagan yana 171 587 kishini qo‘lga olgan.
Bundan tashqari, 140 ta soxta haj kampaniyasi, haj tartibini buzgan 64 ta yo‘lovchi tashuvchi va 97 664 ta qoidabuzarlik sodir etgan avtomashinalar chiqarib yuborilgan. Yashash, ishlash va chegara xavfsizligi qoidalarini buzgan 6105 nafar shaxs ushlangan.
Makka maʼmuriyatiga ko‘ra, 8-iyungacha Saudiya Arabistoniga ro‘yxatdan o‘tgan 1,3 milliondan ortiq ziyoratchilar kelgan, 2023-yilda jami 1,8 million musulmon haj ziyoratini ado etgan. 14-iyun kuni boshlanadigan haj ziyorati Islomning besh arkonidan biri bo‘lib, imkoni bo‘lgan barcha musulmonlar kamida bir marta ado etishlari shart.
Izoh (0)