Qatar va Misr Falastinning HAMAS harakati yetakchilariga G‘azo sektorida o‘t ochishni to‘xtatish taklifiga rozi bo‘lmasa, aktivlarini muzlatish va Dohadan chiqarib yuborish bilan tahdid qildi. Bu haqda manbalarga tayanib, The Wall Street Journal xabar berdi.
Vositachilar AQSH prezidenti Jo Bayden “administratsiyasi ko‘rsatmasi bilan” shunday tahdid qilgani aytilmoqda. Oq uy HAMASni kelishuv tuzishga ko‘ndirish yo‘lini izlayotgani ta’kidlangan. Bosimga qaramay HAMAS o‘t ochishni to‘xtatish rejasida ularning shartlari aks etmagani sababli uni qabul qilmagan.
7-iyunda Qatar Tashqi ishlar vazirligi matbuot kotibi Majid bin Muhammad al-Ansoriy HAMAS G‘azo sektorida o‘t ochishni to‘xtatish va isroillik garovga olinganlarni falastinlik asirlarga almashish bo‘yicha so‘nggi taklifga javoblarini bermaganini bildirdi.
May oyi oxirida AQSH prezidenti Jo Bayden yangi tinchlik bitimi loyihasini e’lon qildi. Dastlab HAMAS tashabbusni ijobiy baholagan bo‘lsa, keyinchalik harakatning Siyosiy byurosi a’zosi Usama Hamdan loyihada Isroil qo‘shinlarini olib chiqib ketish ko‘zda tutilmaganini aytdi. Bayden taklif qilgan rejaga ko‘ra, mojaroni hal etish uch bosqichda amalga oshishi lozim:
- olti haftalik otashkesim, uning davomida garovga olinganlar ozod qilinadi va G‘azo sektoriga insonparvarlik yordami yetkaziladi;
- jangovar harakatlarni to‘liq to‘xtatish va konfliktga borgan tomonlar o‘rtasida muzokaralar boshlash;
- urush paytida vayron qilingan hududlarni tiklash.
Izoh (0)