Қатар ва Миср Фаластиннинг ҲАМАС ҳаракати етакчиларига Ғазо секторида ўт очишни тўхтатиш таклифига рози бўлмаса, активларини музлатиш ва Доҳадан чиқариб юбориш билан таҳдид қилди. Бу ҳақда манбаларга таяниб, The Wall Street Journal хабар берди.
Воситачилар АҚШ президенти Жо Байден “администрацияси кўрсатмаси билан” шундай таҳдид қилгани айтилмоқда. Оқ уй ҲАМАСни келишув тузишга кўндириш йўлини излаётгани таъкидланган. Босимга қарамай ҲАМАС ўт очишни тўхтатиш режасида уларнинг шартлари акс этмагани сабабли уни қабул қилмаган.
7 июнда Қатар Ташқи ишлар вазирлиги матбуот котиби Мажид бин Муҳаммад ал-Ансорий ҲАМАС Ғазо секторида ўт очишни тўхтатиш ва исроиллик гаровга олинганларни фаластинлик асирларга алмашиш бўйича сўнгги таклифга жавобларини бермаганини билдирди.
Май ойи охирида АҚШ президенти Жо Байден янги тинчлик битими лойиҳасини эълон қилди. Дастлаб ҲАМАС ташаббусни ижобий баҳолаган бўлса, кейинчалик ҳаракатнинг Сиёсий бюроси аъзоси Усама Ҳамдан лойиҳада Исроил қўшинларини олиб чиқиб кетиш кўзда тутилмаганини айтди. Байден таклиф қилган режага кўра, можарони ҳал этиш уч босқичда амалга ошиши лозим:
- олти ҳафталик оташкесим, унинг давомида гаровга олинганлар озод қилинади ва Ғазо секторига инсонпарварлик ёрдами етказилади;
- жанговар ҳаракатларни тўлиқ тўхтатиш ва конфликтга борган томонлар ўртасида музокаралар бошлаш;
- уруш пайтида вайрон қилинган ҳудудларни тиклаш.
Изоҳ (0)