Эронда президентликка жами 80 киши, жумладан, тўрт нафар аёл номзодини кўрсатганди. “Конституцияни қўриқлаш кенгаши” уларнинг олти нафарини саралаб, сайловда қатнашишига рухсат берди. Бу ҳақда Меҳр агентлиги хабар берди.
Давлат раҳбари лавозимга расмий номзодлар қуйидагилар (расмда ўнгга қараб кетма-кетликда берилган):
- Эрон Олий етакчисининг Миллий хавфсизлик олий кенгашидаги вакили Саид Жалилий (тепадан биринчиси),
- Эрон собиқ соғлиқни сақлаш ва тиббий таълим вазири, парламент аъзоси Масуд Пезешкиян,
- Парламентнинг амалдаги спикери Муҳаммад Бағeр Ғолибаф,
- Теҳрон мери Алиризо Заканий (пастдан биринчиси),
- Ички ишлар вазирлиги собиқ раҳбари, дин арбоби Мустафа Пурмуҳаммадий.
- Шаҳидлар ва фахрийлар фонди раҳбари Амир-Ҳусайн Ғозизода-Ҳошимий
Эроннинг икки таниқли сиёсатчиси – собиқ президент Маҳмуд Аҳмадинажод ва парламент собиқ спикери Али Ларижонийнинг номзодлари маъқулланмаган. Бундан ташқари номзодликка кўрсатилган тўрт нафар аёл ҳам саралашдан ўтмаган. Шу кунгача эронлик бирорта аёл номзодларнинг якуний рўйхатига киритилмаган. Эрон президенти Иброҳим Раисий авиаҳалокатда вафот этиши сабабли 28 июнь куни мамлакатда муддатидан олдинги президентлик сайловлари бўлиб ўтади. Эронда президент вазифасини бажарувчи Муҳаммад Мохбер сайловларда қатнашишдан бош тортган.
Президент Раисий вафоти
19 май куни Эрон президенти Иброҳим Раисий авиаҳалокат натижасида вафот этди. Мамлакат шимоли-ғарбида Эрон президенти ва ташқи ишлар вазири бўлган вертолёт ҳалокатга учраганди. Кучли туман ва тоғли ҳудуд туфайли ҳалокатга учраган вертолётни қидириш 10 соатдан ортиқ давом этган. Мутахассислар фикрича, фалокат техник носозлик ёки инсон омили туфайли юз берган бўлиши мумкин. Раисий вафоти муносабати билан Эронда беш кунлик мотам эълон қилинган.
Изоҳ (0)