Suriyadagi terrorchilar safiga qo‘shilgan yana bir o‘zbekistonlik qidiruvga berildi

Toshkent shahar IIBB Suriyadagi terroristik tashkilotga qo‘shilgan yana bir O‘zbekiston fuqarosi qidiruvga berilganini ma’lum qildi.

U 1988-yilda Toshkent shahrida tug‘ilgan. Xasanov Nozim No‘monovich bo‘lib, laqabi Zubayr. Tahvid va jihod katibasi xalqaro terrorchilik tashkiloti a’zosi.

Nozim Xasanov 2013-yil yoz oylarida ishlash maqsadida Rossiyaga ketgan. Ekstremistik oqim a’zolari bo‘lgan Abdulloh Zufar va Sodiq Samarqandiyning aqidaparastlik g‘oyalari bilan yo‘g‘rilgan diniy ma’ruzalarini internet orqali eshitib, O‘zbekistonda olib borilayotgan siyosatga nisbatan g‘arazli qarashlari paydo bo‘lgan.

2014-yilda u Turkiyaga ketgan. 2016-yil bahor oylarida esa aylanma yo‘llar orqali Suriyaga o‘tib, Tahvid va jihod katibasi xalqaro terrorchilik tashkilot saflariga qo‘shilgan. Mazkur tashkilot saflarida harbiy tayyorgarlikdan o‘tib, hukumat qo‘shinlariga qarshi jangovar harakatlarda ishtirok etgan.

Hozirda Nozim suriyalik turmush o‘rtog‘i va 5 nafar farzandi bilan Idlib shahrida yashab kelayotgani aniqlandi.

Unga nisbatan Jinoyat kodeksining 244-2-moddasi (diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) bilan jinoyat ishi qo‘zg‘atilib, qidiruv e´lon qilingan.