Parij politsiyasi prefekturasi 5-iyun chorshanba kuni AQSH prezidenti Jo Baydenning Normandiyaga askarlar joylashtirilishining 80 yilligi munosabati bilan Fransiyaga tashrifi davomida xavfsizlik choralarini kuchaytiradi.
Erta tongda Baydenning samolyoti Parijning Orli aeroportiga qo‘ndi va u yerda uni Fransiya Bosh vaziri Gabriel Attal kutib oldi. Fransiyada Amerika yetakchisi bir qator tadbirlarda ishtirok etadi va prezident Emmanuel Makron bilan Ukraina, Yaqin Sharq va iqlim bo‘yicha ikki tomonlama muzokaralar o‘tkazadi.
“Amerika Qo‘shma Shtatlari Prezidenti va birinchi xonimi 2024-yil 5-iyun chorshanbadan 9-iyun yakshanba kuniga qadar Fransiyada bo‘ladi. Shu munosabat bilan politsiya prefekturasi xizmatlari tomonidan xavfsizlik choralari kuchaytiriladi”, — deyiladi politsiyaning X ijtimoiy tarmog‘ida e’lon qilingan xabarida.
Politsiya xavfsizlikni taʼminlash va terrorchilik hujumlarining oldini olish maqsadida “uchuvchi apparatlarga o‘rnatilgan kameralar tomonidan suratga olish va bu tasvirlarni uzatish”ga ruxsat berdi. Ruxsat Parijda 5-iyun erta tongdan 9-iyun kuni soat 14.00 gacha amal qiladi, dedi huquq-tartibot idoralari. Avvalroq Parijda bunday tasvirga olish ishlari taqiqlangan edi.
Shuningdek, Fransiya poytaxti markazidagi bir qancha ko‘chalarda yakshanbaga qadar yo‘l harakati to‘sib qo‘yiladi.
Izoh (0)