AQSH strategik bombardimonchi samolyoti 5-iyun kuni Janubiy Koreyada o‘tkazilayotgan harbiy mashg‘ulotlarga qo‘shilgan. Bu haqda Koreya yarimoroli manbalariga asoslanib, Reuters xabar berdi.
Manbada aytilishicha, AQSHning B-1 strategik bombardimonchi samolyoti chorshanba kungi o‘quv missiyasi davomida Janubiy Koreya qiruvchi samolyotlari bilan birgalikdagi parvozni amalga oshirgan. Samolyotlar shartli dushman bunkerlarini yo‘q qilish operatsiyalarini bajargan.
Harbiy operatsiya davomida strategik bombardimonchi tegishli nuqtalarga JDAM tipidagi snaryadlar uloqtirgan. Bu maʼlumotni Janubiy Koreya Mudofaa vazirligi ham tasdiqlagan. Vazirlik, shuningdek, ushbu turdagi qurol Koreya yarimorolida so‘nggi bor 7 yil oldin ishlatilganini qo‘shimcha qilgan.
Oldinroq Janubiy Koreya hukumati shimolliklar bilan keskinlikni yumshatish va harbiy to‘qnashuvlarning oldini olishga qaratilgan 2018-yilgi harbiy kelishuvni to‘xtatganini maʼlum qilgan edi. Shu voqeadan keyin Shimoliy Koreya bilan chegaradosh demilitarizatsiya zonasi yaqiniga qo‘shimcha harbiy kuchlar joylashtirilishi bildirilgan.
AQSH strategik bombardimonchi samolyoti ham ushbu keskinlik kuchayishi fonida Seulga jo‘natilgan. U favqulodda vaziyatda dushman nuqtalarini o‘ta aniqlikda ura oladigan tizim bilan jihozlangan.
Harbiy mashqlarda B-1 bombardimonchisi birga Janubiy Koreyaning F-15K qiruvchi samolyotlari, shuningdek, Stealth F-35 va F-16 qiruvchilari ham ishtirok etgan. Mashg‘ulot olib borilgan hudud haqida maʼlumot to‘liq taqdim qilinmagan.
Izoh (0)