Париж полицияси префектураси 5 июнь чоршанба куни АҚШ президенти Жо Байденнинг Нормандияга аскарлар жойлаштирилишининг 80 йиллиги муносабати билан Францияга ташрифи давомида хавфсизлик чораларини кучайтиради.
Эрта тонгда Байденнинг самолёти Парижнинг Орли аэропортига қўнди ва у ерда уни Франция Бош вазири Габриэль Аттал кутиб олди. Францияда Америка етакчиси бир қатор тадбирларда иштирок этади ва президент Эммануэл Макрон билан Украина, Яқин Шарқ ва иқлим бўйича икки томонлама музокаралар ўтказади.
“Америка Қўшма Штатлари Президенти ва биринчи хоними 2024 йил 5 июнь чоршанбадан 9 июнь якшанба кунига қадар Францияда бўлади. Шу муносабат билан полиция префектураси хизматлари томонидан хавфсизлик чоралари кучайтирилади”, — дейилади полициянинг Х ижтимоий тармоғида эълон қилинган хабарида.
Полиция хавфсизликни таъминлаш ва террорчилик ҳужумларининг олдини олиш мақсадида “учувчи аппаратларга ўрнатилган камералар томонидан суратга олиш ва бу тасвирларни узатиш”га рухсат берди. Рухсат Парижда 5 июнь эрта тонгдан 9 июнь куни соат 14.00 гача амал қилади, деди ҳуқуқ-тартибот идоралари. Аввалроқ Парижда бундай тасвирга олиш ишлари тақиқланган эди.
Шунингдек, Франция пойтахти марказидаги бир қанча кўчаларда якшанбага қадар йўл ҳаракати тўсиб қўйилади.
Изоҳ (0)