Rossiya Ukrainaning energetika infratuzilmasini navbatdagi yirik hujumga duchor qildi. Bu haqda Ukraina energetika vaziri German Galushenko ma’lum qildi.
Ukrainalik vazirga ko‘ra, zarbalar mamlakatning beshta viloyati: Zaporojye, Dnepropetrovsk, Donetsk, Kirovograd va Ivano-Frankivskdagi obyektlarga qaratilgan. Galushenkoning postida ushbu hujum oqibatlari haqida ochiqlanmagan.
Ayni vaqtda, Kirovograd viloyati harbiy boshqarmasi rahbari Andrey Raykovich taqdim etgan dastlabki ma’lumotlarga ko‘ra, viloyat hududidagi energetika obyektiga zarba berish natijasida qurbonlar yo‘qligini yozgan. RF armiyasining nishoniga aylangan obyekt nomi keltirilmagan.
Shuningdek, Ukraina QK Harbiy-havo kuchlari matbuot xizmati Rossiya qo‘shinlari 1-iyunga o‘tar kechasi Ukrainaning turli mintaqalaridagi muhim infratuzilma obyektlariga havodan kuchli raketa zarbalari berganini ma’lum qilgan.
Ukraina armiyasi ma’lumotlariga ko‘ra, ushbu hujum uchun jami 53 ta turdagi raketalar va 47 ta hujumchi dronlar ishlatilgan. Rossiyaning Saratov viloyatida Tu-95 MS strategik bombardimonchi samolyotlaridan 35 ta Kh-101/Kh-555 qanotli raketalari uchirilgan. Anneksiya qilingan Qrim hududidan yana 4 ta “Iskander-M” ballistik raketasi va bitta “Iskander-K” qanotli raketasi; Qora dengizning shimoli-sharqiy qismidan 10 ta Kalibr qanotli raketalari uchirilgan.
Izoh (0)