Fransiya hukumati 31-may kuni Isroil harbiy sanoat korxonalariga Yevropa miqyosida o‘tkaziladigan Eurosatory-2024 mudofaa ko‘rgazmasida ishtirok etishni taqiqlagan. Bu haqda Fransiya Qurolli kuchlar vazirligi xabariga asoslanib, Defence News nashri xabar berdi.
Fransiya hukumati ko‘rgazmaga ikki hafta qolganda ushbu qarorni eʼlon qilgan. Qarorni qabul qilish uchun asos sifatida Isroilning Rafahda amalga oshirgan operatsiyasi keltirilgan.
“Fransiya rasmiylarining iltimosiga binoan, Isroil kompaniyalari Eurosatory-2024 da ishtirok etmaydi. Prezident Makron Isroilning Rafahdagi operatsiyalarini to‘xtatishga chaqirayotgan bir paytda Isroil harbiy korxonalarini Fransiya ko‘rgazmasida kutib olish mantiqqa to‘g‘ri kelmaydi”, — deyilgan Fransiya Qurolli kuchlari vazirligi 31-may kuni eʼlon qilgan bayonotda.
O‘z navbatida, Fransiya prezidenti Emmanuel Makron Isroilni Falastinning Rafah shahridagi amaliyotlarini to‘xtatishga chaqirgan. Xalqaro chaqiriqlar inobatga olinmasa, Tel-Aviv yangi cheklovlarga duch kelishi aytilgan.
17-iyun kuni Parijda ochiladigan Eurosatory-2024 mudofaa ko‘rgazmasida Isroilning 70 dan ortiq kompaniyalari ishtirok etishi rejalashtirilgan edi. Ular orasida mamlakatning uchta yirik mudofaa firmasi — Israel Aerospace Industries, Elbit Systems va Rafael Advance Defence Systems jamiyatlari ham bor edi.
Manbada keltirilishicha, mudofaa ko‘rgazmasida Isroilning Elbit Systems korxonasi o‘zining PULS raketa tashuvchisi va yangi avlod Sigma gaubitsasini taqdim etishni rejalashtirgan. Ushbu yangi mahsulotlar uchun Yevropada xaridor topish maqsad qilingan.
Stokgolm xalqaro tinchlik yo‘lida tadqiqot instituti maʼlumotlariga ko‘ra, Isroil 2019—2023-yillarda dunyodagi to‘qqizinchi eng yirik qurol eksport qiluvchi davlat bo‘lgan. Uning eksporti global eksportning 2,4 foizini tashkil etgan.
Isroil Mudofaa vazirligi maʼlumotlariga ko‘ra, 2022—2024-yillarda mamlakatning yillik harbiy eksporti hajmi 12,5 milliard AQSH dollarini tashkil etgan. Yevropaga qurol-yarog‘ eksporti hajmi esa 3,67 milliard dollarga yetgan.
Izoh (0)