Rossiya qo‘shinlari Chernigovga hujum qildi: qurbonlar va yaradorlar bor (video)

Rossiya qo‘shinlari 17-aprel kuni Ukrainaning Chernigov viloyatiga hujum qildi. Oqibatda 11 kishi halok bo‘ldi, 22 kishi jarohatlandi. Bu haqda shahar ma’muriyati rahbari Vyacheslav Chaus xabar berdi.

Vayronalar ostida hali ham odamlar bor. Qidiruv-qutqaruv operatsiyasi davom etmoqda. Rossiya qo‘shinlari Chernigov markaziga uchta raketa zarbasi bergan. Chernigov meri vazifasini bajaruvchi Aleksandr Lomako ijtimoiy infratuzilma obyektiga raketa tushganini aytmoqda.

“Afsuski, qurbonlar soni ortishi mumkin. Ukraina havo hujumidan mudofaa tizimlarini yetarlicha olganida va Rossiya terroriga qarshi kurashda dunyoning qat’iyati yetarli bo‘lganida, bunday bo‘lmasdi”, — deya hujumga munosabat bildirdi Ukraina prezidenti Vladimir Zelenskiy.

Rossiya qo‘shinlari Ukraina hududiga har kuni dronlar va raketalar bilan hujum qiladi. So‘nggi bir necha hafta ichida Rossiya harbiylari yangi taktikalardan foydalangan holda energetika infratuzilmasi obyektlariga zarbalar bermoqda. Shuningdek, rus qo‘shinlari kamroq himoyalangan hududlardagi energetika obyektlariga hujum qilayotgani qayd etilgan.