Yaqin Sharq vositachilari Isroil va HAMAS tomonlarini AQSH prezidenti Jo Bayden taklif qilgan sulh bitimini qabul qilishga chaqirdi. Bu haqda tegishli manbalarga tayanib, Deutsche Welle xabar berdi.
Bayonot mualliflari HAMASni ham, Isroilni ham Bayden tomonidan ilgari surilgan tamoyillarni o‘zida mujassam etgan kelishuvni yakunlashga chaqirishlarini aytgan.
Avvalroq Amerika rahbari G‘azoda o‘t ochishni to‘xtatish va 2023-yil 7-oktyabrda HAMASning Isroilga hujumi chog‘ida o‘g‘irlab ketilgan asirlarni ozod qilish bo‘yicha uch bosqichli rejani taqdim etgan edi.
Olti hafta davom etishi kerak bo‘lgan birinchi bosqich G‘azo sektorida to‘liq o‘t ochishni to‘xtatish va Isroil qo‘shinlarini mintaqadagi aholi punktlaridan olib chiqib ketishni taklif qiladi. Shu bilan birga, HAMAS jangarilari yuzlab falastinlik mahbuslarni ozod qilish evaziga bir qancha garovga olinganlarni Isroilga qaytarishi kerak. Ikkinchi bosqichda Isroil qo‘shinlari G‘azo sektoridan to‘liq chiqib ketishi, HAMAS esa qolgan garovdagilarni qaytarishi kerak. Guruh, shuningdek, o‘ldirilganlarning qoldiqlarini oilalariga qaytarishi kerak. Bitimning uchinchi bosqichi AQSH va xalqaro hamjamiyat ko‘magida G‘azoni rekonstruksiya qilishni boshlashni nazarda tutadi.
Isroil ham, HAMAS ham Baydenning rejasini qo‘llab-quvvatlamoqchi emas, — deyiladi xabarda.
Isroil Bosh vaziri Binyamin Netanyaxu yana bir bor urush HAMAS guruhi to‘liq yo‘q qilinganidan, barcha garovga olinganlar ozod etilganidan va G‘azo Isroilga endi xavf tug‘dirmasligi ta’minlangandan keyingina yakunlanishini ta’kidlagan.
Izoh (0)