Oltoy Respublikasining Onguday tumanida “Putin qarorgohi” nomi bilan tanilgan “Gazprom” binosi yonib ketgani aytilmoqda. Bu haqda Navalniyning “Sirena” jamoasi xabar berdi.
Yonib ketgan bino suratlarini bloger Amir Aytashev va faol Aruna Arna e’lon qilgan. Suratlar turli burchaklardan olingan. Aytashevning taʼkidlashicha, u eʼlon qilgan surat 30-may kuni olingan. Yong‘in sabablari noma’lum. Mahalliy Favqulodda vaziyatlar vazirligi rossiyalik jurnalistlarga vaziyat yuzasidan izoh berishdan bosh tortgan. Bino rasman “Gazprom”ga tegishli bo‘lib, sanatoriy-kurort majmuasi hisoblanadi. Norasmiy ravishda u “Putin dachasi” deb ataladi.
Kompleks kiyiklarning naslchilik fermasini o‘z ichiga oladi. “Proyekt” nashri 2022-yilda Putinning sog‘lig‘iga oid tekshiruvni e’lon qilganida, Rossiya prezidenti bu jonivorlar shoxlari ekstraktidan vanna qabul qilishini yozgandi. Mazkur dacha qurilishi haqida ma’lumot 2010-yilda paydo bo‘lgan. Uning qurilishiga qariyb 3 milliard rubl sarflangan.
2011-yilda “Novaya gazeta” muxbirlari majmuaga kirishga harakat qilgan, biroq qo‘riqchi “inshoot davlatning yuqori martabali amaldorlari dam olishi uchun mo‘ljallanganini” tushuntirib, ularni ortga qaytargan. O‘shanda “Gazprom” bu qarorgoh “biznes hamkorlar bilan uchrashuvlar, korporativ tadbirlar va xorijiy mehmonlarni qabul qilish” uchun zarurligini bildirgan.
-u_87Tu_T.jpg)
Majmua Putinga aloqadorligi haqida muxolifat vakillari ma’lum qilgan. Turli manbalarga ko‘ra, bu yerda 100 ming kishini sig‘dira oladigan “Putin bunkeri” ham mavjud, ammo bu ma’lumot hali tasdiqlanmagan.
Izoh (0)