Nafaqat Gollivudni, balki dunyoni ham zabt etgan 7 nafar osiyolik aktrisa (foto)

Oxirgi kunlarda barchaning og‘zida bir ism — aktrisa Mishel Yeo bir necha kun oldin “Eng yaxshi ayol roli” uchun “Oskar”ni qo‘lga kiritdi va “Oskar”ga loyiq ko‘rilgan birinchi osiyolik ayol bo‘ldi. Bir paytlar Yevropa va Amerika filmlarida osiyolik qiyofa chindan ham ekzotik edi, shunga qaramay o‘sha paytda ham Osiyo mamlakatlari aktrisalari iste’dodlari tufayli katta ekranlarga chiqqan.

Lyusi Liu

54 yoshli xitoylik aktrisa (ota-onasi tayvanlik) ekzotik osiyocha qiyofaga ega eng mashhur aktrisalardan biridir. Lyusi tug‘ilganidan beri AQSHda yashaydi — u Nyu Yorkda tug‘ilib o‘sgan, ammo bo‘lajak aktrisa ingliz tilini faqat 5 yoshida o‘rgana boshlagan — uning oilasi xitoy tilida gaplashgan.

Lyusi Michigan universitetining Osiyo tillari va madaniyati fakultetini tamomlagan. O‘qishning so‘nggi yillarida u “Alisa mo‘jizalar mamlakatida” spektaklida ishtirok etadi, shundan so‘ng uning haqiqiy ishi aktrisalik ekanini anglaydi. Lyusi Los-Anjelesga ko‘chib o‘tadi va Gollivudni zabt etishga harakat qila boshlaydi, ammo osiyocha tashqi ko‘rinish bilan buni uddalash ancha qiyin edi. Uzoq vaqt davomida u “Elli MakBil” teleserialidagi yordamchi rollardan biriga taklif qilinmaguncha epizodik rollarni ijro etadi. 1999-yilda u “Emmi” mukofotining “Eng yaxshi yordamchi aktrisa” nominatsiyasiga nomzod bo‘lgan. Hozirda uning filmografiyasi yuzdan ortiq rollarni o‘z ichiga oladi.

Sandra O

51 yoshli Sandra O “Ehtiros anatomiyasi” va “Yevani o‘ldirish” serialidagi rollari bilan tanilgan, ammo u Gollivudga begona emas — uning filmografiyasida yuzga yaqin rollar mavjud.

Sandra Oning ota-onasi koreys bo‘lib, u tug‘ilishidan ancha oldin Kanadaga ko‘chib kelgan. Sandra balerina bo‘lishi mumkin edi, lekin teatr san’atiga qiziqib qoladi.

2005-yilda Shonda Rayms Sandra Oni “Ehtiros anatomiyasi” serialidagi Kristina Yang rolini o‘ynashga taklif qiladi. Film muvaffaqiyatga erishadi — natijada o‘n yillikning eng ko‘p muhokama qilingan va baholangan televizion loyihalaridan biriga aylanadi. Bu roli uchun O 2006-yilda “Televideniyedagi eng yaxshi ikkinchi darajali aktrisa” nominatsiyasida “Oltin globus” mukofotini va 2006-yilda dramatik seriallaridagi “Eng yaxshi aktrisa” uchun Amerika aktyorlari gildiyasi mukofotiga sazovor bo‘ladi, shuningdek, besh yil ketma-ket “Eng yaxshi ikkinchi plandagi aktrisa” uchun “Emmi” mukofotiga nomzod bo‘ladi. 2018-yilning 12-iyulida u “Yevani o‘ldirish” filmidagi roli uchun “Dramatik seriallaridagi eng yaxshi aktrisa” nominatsiyasida “Emmi” mukofotiga loyiq ko‘rilgan birinchi osiyolik aktrisa bo‘lib tarixga kiradi. Xuddi shu roli uchun u “Oltin globus” mukofotini ham oladi.

Jemma Chan

Aktrisa Buyuk Britaniyada, xitoylik muhojirlar oilasida tug‘ilgan. Bolaligidan Jemma turli xil san’at turlariga qiziqadi, lekin hayotini ijod bilan bog‘lash haqida o‘ylamaydi. U Oksford universitetidagi Vuster kollejining huquq fakultetiga o‘qishga kiradi. O‘qishni tugatgach, aktrisa bo‘lishni xohlayotganini tushunadi va Londondagi drama teatri qoshidagi aktyorlik maktabiga o‘qishga kirishga qaror qiladi. O‘qish bilan bir qatorda Chan model sifatida ishlagan. Diplomni olgandan so‘ng Jemma Chan teatr va filmlarda rol o‘ynashni boshlaydi. Avvaliga u asosan teleseriallarda (“Doktor Kim”, “Sherlok”, “Odamlar”), keyin esa badiiy filmlarda suratga tushgan. Ular orasida “Jodu saltanati”, “O‘ta badavlat osiyoliklar”, “Kapitan Marvel” filmlari bor. Jemma bu yil 41 yoshga to‘ladi.

Gun Li

Mashhur aktrisani xitoylik Meril Strip deb atashadi, chunki u kuchli va jasur qahramonlarni ijro etadi. Gun Li 1965-yilda Shenyang shahrida tug‘ilgan. Qiz bolaligidan raqsga tushishni yaxshi ko‘rar, qo‘shiqchi bo‘lishni orzu qilardi. 1983-yilda Pekindagi Markaziy dramatik san’at akademiyasiga o‘qishga kiradi.

Aktrisa sifatida u rejissyor Chan Yimou bilan hamkorligi orqasidan xalqaro eʼtirofga sazovor bo‘ladi — Xitoy kinosini Yevropa va Qo‘shma Shtatlarda ommalashtirishga yordam beradi. Gun Li ko‘plab mukofotlar, jumladan, ikkita “Oltin xo‘roz” mukofoti, uchta “Yuzta gul” mukofoti, AQSH Milliy kinotanqidchilar kengashi mukofoti, Berlin, Kann va Venetsiya kinofestivallari sovrindori, shuningdek, “Dunyo artisti” faxriy unvoni sohibidir. 

Gana Bayarsaykan

Mo‘g‘ul aktrisasi va modeli Ulan-Bator shahrida tug‘ilgan. U faoliyatini model sifatida boshlagan — Schön va Where jurnallari uchun suratga tushgan. Dramaturgiya bo‘yicha o‘qishni tugatgandan so‘ng, kastinglardan yiqilmaslik uchun nutqi va intonatsiyasini rivojlantirishga yordam beradigan maxsus kursda o‘qiydi.

Gana Gollivud filmida bosh rolni ijro etgan birinchi mo‘g‘ul aktrisasidir. Bayarsayxon ekrandagi debyutini “Mashinadan” filmida android Jeyd roli bilan qiladi, u Oskar Ayzek, Donall Glison va Alisiya Vikander bilan birga o‘ynaydi. U “Ben-Gur” (2016) va “Mo‘jizakor ayol” (2017) filmlarida ham ishtirok etadi. “Varvarlarni kutib” filmida Jonni Depp bilan birga o‘ynagan, 2019-yilda 76-Venetsiya xalqaro kinofestivalida mazkur filmning premyerasi bo‘lgan. Gananing filmografiyasida 11 ta film va teleseriallardagi rollar mavjud; u ko‘proq model sifatida taniqli.

Jan Xe-Jin

Aktrisa Janubiy Koreyaning Pusan ​​shahrida tug‘ilgan. Koreya Milliy sanʼat universitetining aktyorlik fakultetini tamomlagan. U 1998-yilda “Rojdestvoda qor yog‘sa” filmida aktyorlik debyutini qilgan. Umuman olganda, 48 yoshli aktrisaning filmografiyasi 30 ga yaqin film va teleseriallarni o‘z ichiga oladi. U 2020-yilda “Eng yaxshi film”, “Eng yaxshi rejissyor”, “Eng yaxshi original ssenariy” va “Eng yaxshi xorijiy film” nominatsiyalarida “Oskar” mukofotlarini qo‘lga kiritgan Bon Jun Xoning “Parazitlar” filmida bosh rolni ijro etganidan keyin butun dunyoga tanildi.

Bunday muvaffaqiyatdan so‘ng, Jan Xe Jin turli loyihalarga, asosan, dramalarga faol taklif qilina boshlandi.

Jeymi Chon

Jeymi Chon amerikalik koreys oilasida tug‘ilgan. U Kaliforniya universitetini tamomlagan va u yerda iqtisod bo‘yicha tahsil olgan. Uning kinoga bo‘lgan yo‘li realiti-shoularda ishtirok etish orqali boshlanadi. Shunday qilib, u “Tez yordam” va “Ehtiros anatomiyasi” epizodlarida rol o‘ynaydi.

Chonning birinchi asosiy roli “Samuray qizi” teleserialida, undan keyin “Malikani himoya qilish dasturi”, “Ajdaho marvaridi: evolyutsiya”, “Yotoqxonadagi qichqiriq”, “Odnoklassniki” filmlaridagi rollari bo‘lgan. Bu yil aktrisa o‘zining 40 yoshini nishonlaydi.