Navoiyda maktab o‘quvchisi boshqargan Matiz YTHga uchradi. Qurbonlar bor

Navoiyda o‘quvchi boshqargan Matiz yo‘l-transport hodisasiga uchrashi oqibatida ikki kishi halok bo‘ldi. Bu haqda “Markaziy studiya” informatsion dasturida ma’lum qilindi.

Qayd etilishicha, maktab o‘quvchilari Matiz avtomobilini ijaraga olib, Nurota bo‘ylab harakatlanib ketayotgan bo‘lgan. Qaytishda ular boshqaruvni yo‘qotib, yo‘l-transport hodisasiga uchragan. Oqibatda ulardan ikki nafari vafot etgan, bir nafari Karmana tuman shifoxonasiga yotqizilgan.

Men ularning “pravasi” yo‘qligini va yoshi kichkina ekanini bilmagandim. Bilganimda, mashinani ularga bermasdim, — deydi mashinani ijaraga bergan shaxs.

Bundan oldin Navoiy viloyati Karmana tumanidagi 30-maktabning dars vaqtida cho‘milishga borgan 6-sinf o‘quvchilaridan biri cho‘kib ketgani ma’lum bo‘lgandi. Avvalroq bo‘lsa Farg‘onada traktorni boshqarib, poyezd bilan to‘qnashgan maktab o‘quvchisi halok bo‘lgani to‘g‘risida xabar berilgan edi.