Toshkentda ko‘p qavatli uy xonadonlarini poylagan erkakka chora ko‘rildi

Toshkent shahar Mirzo Ulug‘bek tumanidagi ko‘p qavatli uy xonadonlarini poylagan erkakka chora ko‘rildi.

Ijtimoiy tarmoqlarda noma’lum shaxsning ko‘p qavatli uylarning birida xonadon eshiklarini birma-bir tortib, tashqaridan turib xonadon ichkarisini eshitayotgani aks etgan video tarqaldi.

UzNews’ning yozishicha, 2-may kuni A.B. ismli shaxs tungi soat 02:30 atrofida Mirzo Ulug‘bek tumanidagi ko‘p qavatli 142-uyning xonadonlariga ko‘z tirqishlari orqali qarab, ushbu xonadonlarni eshitib turish orqali kuzatib yurgani natijasida xonadonda yashovchilarni qo‘rqitib, ularning tinchligini buzgan.

Mazkur holat bo‘yicha u IIB binosiga taklif qilinganida, idoraga kelishdan bosh tortib, IIO xodimlarining qonuniy talablarini bajarmagan.

Holat yuzasidan 23-may kuni Ma’muriy javobgarlik to‘g‘risidagi kodeksning 183-moddasi (mayda bezorilik) va 194-moddasi (ichki ishlar organlari xodimining qonuniy talablarini bajarmaslik) 1-qismi bilan ayblangan A.B.ga nisbatan Mirzo Ulug‘bek tuman sudi qarori o‘qilgan.

Unga ko‘ra, sudlanuvchi 5 sutkaga qamaldi va BHMning 5 baravari miqdorida jarimaga tortildi.