Qozog‘istonda turmush o‘rtog‘i Saltanat Nukenovaning o‘limida aybdor deb topilgan sobiq iqtisodiyot vaziri Kuandik Bishimbayevning farzandlari familiyasini o‘zgartirish niyatida. Bu haqda Bishimbayevning sobiq rafiqasi Nozim Kaxarmon ma’lum qildi.
Ikki oydan ortiq davom etgan Bishimbayevga nisbatan sud jarayoni butun dunyoda keng rezonansga sabab bo‘ldi. Sud Bishimbayevni 24 yilga ozodlikdan mahrum qildi. U jazoni Arshalidagi koloniyada o‘taydi.
Kaxarmanning so‘zlariga ko‘ra, uning oilasi sud jarayoni davomida qiynalgan. Bolalar psixologik jarohatlarga duch kelgan va shaxsiy ma’lumotlarini o‘zgartirishga qaror qilgan, chunki jinoyatdan keyin familiya “umumiy nomga aylangan”.
“Yaxshi odam edi, afsuski, bobosining nomini va xotirasini sharmanda qildi, tahqirladi. Ota, albatta, abadiy ota bo‘lib qoladi. Undagi yaxshi xislatlarni olib, hayot uchun rahmat deyish kerak. Ammo u odam o‘ldirib, o‘z hayotini barbod qildi va shu tariqa farzandlariga pand berdi. Jahl qilish, achinish, yig‘lash va qo‘yib yuborish. Uning o‘z yo‘li bor, bolalar otasi uchun mas’ul emas, ular uni tarbiyalamagan, bu hayotga taklif qilmagan. Uni qo‘llab-quvvatlash va sevishga majbur emaslar. Farzandlar oldida biz, ota-onalar mas’ulmiz”, — deydi Kaxarman.
Saltanat Nukenovaning o‘limi
2023-yilning 9-noyabr kuni Ostonadagi restoranlardan birida Qozog‘iston sobiq iqtisodiyot vaziri Kuandik Bishimbayevning turmush o‘rtog‘i Saltanat Nukenova tan jarohatlari yetkazilgani oqibatida vafot etdi. Hodisadan bir kun avval kechqurun Bishimbayev “Bau” restoranida rafiqasi bilan janjallashib qolgan. Erkak ilk bor Saltanat Nukenovani hojatxonada, keyin esa liftdan chiqishda urgan. Shundan so‘ng, sobiq vazirning so‘zlariga ko‘ra, turmush o‘rtog‘i restoranning VIP kabinasida divanga yotib uxlab qolgan.
U 9-noyabr kuni kechqurun Nukenovaning yuzi va tanasi sovuq ekanini payqagach, tez yordam chaqirgan. Shifokorlar ayolning bir kun avval o‘lganini aniqlagan.
12-noyabr kuni Bishimbayev ikki oyga hibsga olingan. Yanvar oyi boshida Bishimbayev ishi bo‘yicha tergov yakunlangan. Sobiq vazir ustidan sud jarayoni 2024-yil 27-martdan boshlangan.
Ma’lumot o‘rnida, 2018-yil martida Bishimbayev pora olgani uchun 10 yilga ozodlikdan mahrum etilgandi, 2019-yil fevralida u afv qilingan va 2019-yil oktyabr oyida shartli ravishda ozod etilgan.
Bishimbayev 2016-yilning may oyi boshidan dekabr oyi oxirigacha Milliy iqtisodiyot vazirligini boshqargan.
Izoh (0)