Қозоғистонда турмуш ўртоғи Салтанат Нукенованинг ўлимида айбдор деб топилган собиқ иқтисодиёт вазири Куандик Бишимбаевнинг фарзандлари фамилиясини ўзгартириш ниятида. Бу ҳақда Бишимбаевнинг собиқ рафиқаси Нозим Кахармон маълум қилди.
Икки ойдан ортиқ давом этган Бишимбаевга нисбатан суд жараёни бутун дунёда кенг резонансга сабаб бўлди. Суд Бишимбаевни 24 йилга озодликдан маҳрум қилди. У жазони Аршалидаги колонияда ўтайди.
Кахарманнинг сўзларига кўра, унинг оиласи суд жараёни давомида қийналган. Болалар психологик жароҳатларга дуч келган ва шахсий маълумотларини ўзгартиришга қарор қилган, чунки жиноятдан кейин фамилия “умумий номга айланган”.
“Яхши одам эди, афсуски, бобосининг номини ва хотирасини шарманда қилди, таҳқирлади. Ота, албатта, абадий ота бўлиб қолади. Ундаги яхши хислатларни олиб, ҳаёт учун раҳмат дейиш керак. Аммо у одам ўлдириб, ўз ҳаётини барбод қилди ва шу тариқа фарзандларига панд берди. Жаҳл қилиш, ачиниш, йиғлаш ва қўйиб юбориш. Унинг ўз йўли бор, болалар отаси учун масъул эмас, улар уни тарбияламаган, бу ҳаётга таклиф қилмаган. Уни қўллаб-қувватлаш ва севишга мажбур эмаслар. Фарзандлар олдида биз, ота-оналар масъулмиз”, — дейди Кахарман.
Салтанат Нукенованинг ўлими
2023 йилнинг 9 ноябрь куни Остонадаги ресторанлардан бирида Қозоғистон собиқ иқтисодиёт вазири Куандик Бишимбаевнинг турмуш ўртоғи Салтанат Нукенова тан жароҳатлари етказилгани оқибатида вафот этди. Ҳодисадан бир кун аввал кечқурун Бишимбаев “Бау” ресторанида рафиқаси билан жанжаллашиб қолган. Эркак илк бор Салтанат Нукеновани ҳожатхонада, кейин эса лифтдан чиқишда урган. Шундан сўнг, собиқ вазирнинг сўзларига кўра, турмуш ўртоғи рестораннинг VIP кабинасида диванга ётиб ухлаб қолган.
У 9 ноябрь куни кечқурун Нукенованинг юзи ва танаси совуқ эканини пайқагач, тез ёрдам чақирган. Шифокорлар аёлнинг бир кун аввал ўлганини аниқлаган.
12 ноябрь куни Бишимбаев икки ойга ҳибсга олинган. Январь ойи бошида Бишимбаев иши бўйича тергов якунланган. Собиқ вазир устидан суд жараёни 2024 йил 27 мартдан бошланган.
Маълумот ўрнида, 2018 йил мартида Бишимбаев пора олгани учун 10 йилга озодликдан маҳрум этилганди, 2019 йил февралида у афв қилинган ва 2019 йил октябрь ойида шартли равишда озод этилган.
Бишимбаев 2016 йилнинг май ойи бошидан декабрь ойи охиригача Миллий иқтисодиёт вазирлигини бошқарган.
Изоҳ (0)