Britaniya mudofaa vaziri Grant Shappsning aytishicha, NATOga aʼzo bo‘lmagan, ammo uning mudofaa qobiliyatidan foydalanayotgan neytral davlatlar harbiy ittifoqqa qo‘shilishi kerak. Bu haqda u Londondagi chiqishi chog‘ida aytib o‘tdi, deb yozadi Politico.
Shapps NATO a’zosi bo‘lmagan va betaraflik pozitsiyasiga ega Irlandiya, Malta, Avstriya va Shveysariya kabi Yevropa davlatlariga to‘g‘ridan to‘g‘ri ishora qilmagan. Biroq u Buyuk Britaniya ko‘proq mamlakatlarning NATOga qo‘shilishi uchun tashabbus ko‘rsatishini aytdi.
“NATO himoyasidan bahramand bo‘lganlarning barchasini ittifoqqa qo‘shilishga chaqiraman, ba’zi Yevropa davlatlari NATO himoyasidan samarali foydalanadi, lekin qit’ani jamoaviy ravishda himoya qilishga qo‘shilmaydi”, — dedi Britaniya mudofaa vaziri.
“Bo‘ri Yevropa xavfsizligi eshigining ortida turganida betaraflikka o‘rin qolmasligi kerak”, — deya qo‘shimcha qildi Shapps.
Politico’ning qayd etishicha, Rossiyaning Ukrainadagi keng ko‘lamli urushi ayrim neytral Yevropa davlatlarida uzoq yillik siyosatni qayta ko‘rib chiqish va NATOga a’zo bo‘lish haqida munozaralarga sabab bo‘lgan.
Finlyandiya va Shvetsiya shunday munozaralardan so‘ng ittifoqqa qo‘shilgan.
Shapps NATOning amaldagi a’zolarini mudofaa xarajatlarini YIMning 2,5 foizigacha oshirishga chaqirar ekan, alyansning hozirgi maqsadi yalpi ichki mahsulotning kamida 2 foizini mudofaa uchun sarflash ekanini aytib o‘tdi.
Izoh (0)