Balx viloyatidagi eng yirik gilam sotiladigan bozorlardan biri Mozori Sharif shahrida joylashgan. “Daryo” muxbiri Mozori Sharifdagi gilam do‘konlariga borib, gilam sotuvchilar bilan suhbatlashdi.
Balxdagi bir qator gilam sotuvchilarning aytishicha, bu soha bozori misli ko‘rilmagan tanazzulga duch kelgan.
Sotuvchilarga ko‘ra, Afg‘onistonning ichki gilamlarining aksariyati Faryob, Juzjon, Sarpul va Balx viloyatlarida to‘qilgan bo‘lib, bu ishni, asosan, Afg‘onistonning shimoliy viloyatlaridagi o‘zbeklar va turkmanlar amalga oshiradi.
Hozirda Afg‘oniston gilamlari uchun na mamlakat ichida, na tashqarida mos bozor bor.
Rasmiy statistik ma’lumotlarga ko‘ra, avvallari Afg‘onistonning shimoliy viloyatlarida yiliga bir million 500 ming kvadrat metrdan ortiq gilamlar ishlab chiqarilgan.
Ammo gilam sotuvchilarning aytishicha, odamlarning moliyaviy imkoniyatlari yaxshi emasligi sababli gilam sotuvlari pasaygan.
Balx viloyatiga gilamlar, asosan, Turkiya, Eron va O‘zbekistondan keltiriladi. Gilam sotuvchilardan biri Zabihullohning aytishicha, odamlar Eron va O‘zbekiston gilamlarini arzonligi uchun afzal ko‘rishadi.
Uning so‘zlariga ko‘ra, yangi turmush qurganlar ham asosan Eron va O‘zbekiston gilamlarini sotib olishadi.
“Xalqning iqtisodiy ahvoli yaxshimasligi tufayli birorta ham gilam sotmaydigan kunlar bor”, — deydi Zabihulloh.
Hozirda Mozori Sharif gilam do‘konlari bozorida bir kvadrat metr gilam narxi 5 dollardan 50 dollargacha sotilmoqda.
Izoh (0)