Toshkent shahrida aksiz markasiz tamaki mahsulotlarini muomalaga kiritilishining oldi olindi, deb xabar beradi Bosh prokuratura huzuridagi departament.
Qayd etilishicha, departamentning Uchtepa tuman bo‘limi tomonidan Toshkent shahar bojxona boshqarmasi xodimlari bilan hamkorlikda tezkor tadbir o‘tkazilgan. Tadbirda tamaki mahsulotlari savdosi bilan shug‘ullanib kelgan A.Y. o‘z uyida umumiy bahosi 116,5 million so‘m bo‘lgan olti turdagi xorijda ishlab chiqarilgan jami 8 770 quti aksiz markasiz tamaki mahsulotini o‘tkazish maqsadida saqlab kelayotgani aniqlanib, ushbu tamaki mahsulotlari ashyoviy dalil sifatida olingan.
Mazkur holat yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.
Bir necha kun oldin Chust tumanida 5 ming quti “Milano” nomli aksiz markasiz tamaki mahsulotlari savdosi to‘xtatib qolingan edi. Undan oldin ham Namanganda 2 ming quti aksiz markasiz tamaki mahsulotlari muomalaga kiritilishining oldi olingandi.
Izoh (0)