Xalqaro jinoiy sud statutini ratifikatsiya qilgan barcha davlatlar uning qarorlarini bajarishga majburdirlar. Bu haqda Yevropa Ittifoqi bosh diplomati Josep Borrel ma’lum qildi.
“Men Xalqaro jinoiy sud prokurorining Yahyo Sinvar, Muhammad Deif, Ismoil Xoniya, Benyamin Netanyaxu va Yoav Gallantni hibsga olish uchun order berishni so‘rash haqidagi qarorini eʼtiborga olaman”, — deb yozdi u X ijtimoiy tarmog‘ida.
Diplomatning ta’kidlashicha, Xalqaro jinoiy sudning vakolati xalqaro huquq bo‘yicha eng og‘ir jinoyatlarni ta‘qib qilishdir. “XJS nizomini ratifikatsiya qilgan barcha davlatlar sud qarorlarini bajarishga majburdirlar”, — deya qo‘shimcha qildi Borrell.
Xalqaro jinoiy sud Netanyaxuni hibsga olish uchun order berishi mumkin
Eslatib o‘tamiz, 20 may kuni prokuror Karim Xon Isroil bosh vaziri va Mudofaa vazirligi rahbarini hibsga olishga order berishni so‘ragan edi. Shuningdek, HAMASning uch nafar yetakchisi ham insoniyatga qarshi jinoyatlarda ayblanmoqda.
Bu qaror Isroil va Amerika Qo‘shma Shtatlarida qoralandi. Vakillar palatasi spikeri Mayk Jonson XJSga qarshi sanksiyalar kiritishga tayyor ekanliklarini aytdi va prezident Jo Bayden har doim Isroil bilan birga bo‘lishga va’da berdi.
Izoh (0)