Fransiya prezidenti Emmanuel Makron fuqaroviy tartibsizliklar va zo‘ravonliklar kuchayishi ortidan Yangi Kaledoniyaga boradi. Bu haqda G‘arb manbalariga tayanib, Al Jazeera nashri xabar berdi.
Manbada aytilishicha, Fransiya hukumati Kaledoniyadagi vaziyatni barqarorlashtirish uchun qo‘shimcha harbiy kuchlar yuborish to‘g‘risidagi qarorni imzolagan. Makron ham Yangi Kaledoniyada harbiy shtab boshliqlari bilan yig‘ilish o‘tkazishi maʼlum qilingan.
Kaledoniyadagi Numea xalqaro aeroporti xalqaro reyslar uchun yopilgani maʼlum qilingan. Bu aeroportdan hozirda faqat hukumat rasmiylari foydalanmoqda.
Avstraliya va Yangi Zelandiya harbiylariga Numea aeroportidan foydalanishga ruxsat berilgan. Hozirda harbiylar o‘z mamlakati vakillarini Kaledoniyadan evakuatsiya qilmoqda.
Yangi Kaledoniyada hozirda davom etayotgan tartibsizliklar so‘nggi 30 yil ichidagi eng yirik g‘alayon hisoblanadi. Tartibsizliklarni bostirishning birinchi bosqichida Fransiya hududga 1500 nafardan ko‘proq harbiy kiritgan.
Yangi Kaledoniyadagi Fransiya davlatini ifoda etuvchi Oliy komissiya Parijga murojaat yo‘llab, 600 nafar qo‘shimcha askar yuborishni so‘ragan. Parijdagi maʼmuriyat talabni qondirgan.
Hozirda Yangi Kaledoniya poytaxti Numea ko‘chalarida blokadalar o‘rnatilgan. Avtomobillar va korxonalarga o‘t qo‘yilgan. Do‘konlar talon-taroj qilingan. So‘nggi sutkada 6 kishi halok bo‘lgani aytilgan.
Tahlilchilar Yangi Kaledoniya orolida tartibsizliklar yuzaga kelishiga bosh omil sifatida Parij tomonidan orolda saylov qonunchiligini o‘zgartirish to‘g‘risida qaror chiqarilishini keltirgan. Parijning tutgan yo‘lidan norozi olomon Numea ko‘chalarida g‘alayonlar uyushtirgan.
Maʼlumot o‘rnida, Yangi Kaledoniya Okeaniya mintaqasida (Sharqiy Avstraliya va Polineziya) joylashgan orol mamlakat. Mamlakat rasman Fransiyaning okeanorti provinsiyasi hisoblanadi. Mamlakat fuqarolariga eʼtiqodi va etnik kelib chiqishidan qatʼiy nazar Fransiya pasporti beriladi. Hudud katta miqdorda nikel va ko‘mir zaxiralariga boy ekanligi aytiladi. Fransiya nazoratidagi ushbu okeanorti hududi Avstraliya va Yangi Zelandiya kabi qo‘shnilari bilan mustahkam iqtisodiy aloqalarga ega.
Izoh (0)