AQSH prezidenti Jo Bayden agar HAMAS garovda ushlab turilgan isroilliklarni ozod qilsa, G‘azoda o‘t ochishni to‘xtatishga “ertagayoq” erishish mumkinligini aytgandi. Falastinning HAMAS harakati mazkur taklifga javob qaytardi. Bu haqda Al Arabiya xabar berdi.
HAMAS harakatining bayonotiga ko‘ra, Baydenning mazkur taklifi muzokaralar uchun “to‘siq” bo‘ladi.
Biz AQSH prezidentining bu pozitsiyasini qoralaymiz. Buni vositachilar tomonidan ilgari surilgan taklifga HAMAS rozilik bildirishiga olib kelgan muzokaralarning so‘nggi raundi natijalaridan chekinish deb bilamiz, — deyiladi bayonotda.
May oyining boshida HAMAS xalqaro hamjamiyatning G‘azoda o‘t ochishni to‘xtatish to‘g‘risidagi taklifini qabul qildi. HAMAS yetakchisi Ismoil Haniya 6-mart kuni Qatar bosh vaziri va Misr razvedka xizmati rahbari bilan telefon muloqotida bunga rozi bo‘lgan.
Taklif qabul qilingan kuni Isroil harbiylari G‘azo sektorining janubidagi Rafahning sharqiy hududlarida harbiy amaliyotlar boshladi. U yerda yashayotgan ayrim falastinliklar G‘azoning shimoliy va markaziy qismiga qochishga majbur bo‘ldi. Isroil bosh vaziri idorasi garovga olinganlarni ozod qilish masalasida HAMASga bosim o‘tkazish uchun Rafahdagi amaliyotni davom ettirishga bir ovozdan qaror qilgan.
Bundan tashqari, Isroil harbiylari G‘azoga gumanitar yordam yetkazilishiga imkon beruvchi — Rafah va Kerem Shalom nazorat-o‘tkazish punktining Falastin qismini egallab olgan. HAMASning aytishicha, Isroil bosh vaziri Binyamin Netanyaxu Rafahga hujum uyushtirib, muzokaralarni izdan chiqarishga shoshgan.
Izoh (0)