Исроил президенти Исаак Герцог 20 май куни Халқаро жиноий суд прокурори томонидан бош вазир Биньямин Нетаньяхуни ҳибсга олиш учун ордер талаб қилинишига нисбатан ўз муносабатини билдирди. Бу ҳақда The Times of Israel нашри хабар берди.
Президент Исаак Герцог жиноий суд прокурори Карим Хоннинг Биньямин Нетаньяху ва мудофаа вазири Йоав Галантни ҳибсга олиш учун ордер бериш ҳақидаги талабини “шармандали” деб атаган. Ушбу каби ҳодисалар халқаро суд тизими қулаш арафасида эканини кўрсатишини маълум қилган.
“Разил ният билан амалга оширилган бу бир томонлама ҳаракат бутун дунё бўйлаб террорчиларни жасоратга ундайдиган бир томонлама сиёсий қадамдир. Ушбу талаб бир-бирини тўлдириш тамойили ва бошқа ҳуқуқий нормаларга мувофиқ суднинг барча асосий қоидаларини бузади”, — деган Исроил президенти.
Исаак Герцог, шунингдек, ҲАМАС етакчилари ва Исроилнинг демократик йўл билан сайланган ҳукумати ўртасида ўхшашлик яратишга бўлган ҳар қандай уринишни нафратланарли ҳолат деб атаган. Исроил елкасига ҳеч қандай айб қўймасликка чақирган.
“Биз бу урушни ким бошлаганини, ким бегуноҳ фуқаролар ва оилаларни зўрлаганини, сўйганини, ёқиб юборганини, шафқатсизларча ўғирлагани ва яширганини унутмаймиз”, — дея сўзи охирида дунёнинг барча раҳбарларини жиноий судга киритилган талабномани қоралашга чақирган Исроил президенти.
Изоҳ (0)