Эрон президенти Иброҳим Раисий 19 май куни авиаҳалокатда ҳалок бўлгани сабаб унинг ваколатлари биринчи ўринбосари, вице-президент Муҳаммад Мохберга ўтади.
“Президент вафот этган, ишдан бўшатилган, истеъфога чиққан, икки ойдан ортиқ муддат давомида ишда бўлмаган ёки касал бўлган тақдирда ёки президентлик муддати тугаган ва янги президент ҳалигача сайланмаган тақдирда биринчи вице-президент раҳбариятнинг розилиги билан унинг ваколатлари ва вазифаларини бажаришга киришади”, дейилади Эрон Конституциясининг 131-моддасида.
Мажлис спикери, суд ҳокимияти раҳбари ва биринчи вице-президентдан иборат кенгаш 50 кун ичида президент сайловини ташкил қилиши керак.
2021 йилдан бери Эрон вице-президенти лавозимини Муҳаммад Мохбер эгаллаб келади. Бунгача у 2007 йилдан Эроннинг собиқ олий раҳнамоси Оятуллоҳ Руҳуллоҳ Ҳумайнийнинг буйруқларини бажариш штабига раҳбарлик қилган.
Раисий вертолёти ҳалокатга учраши
Бортида Эрон президенти бўлган вертолёт 19 май куни Эрон-Озарбайжон чегараси яқинидаги Верзеган шаҳри тоғли ҳудудига “қаттиқ қўнган”ди. Қутқарувчилар 20 май куни вертолёт ҳалокатга учраган жойни аниқлаган. Вертолёт “қаттиқ қўниш” чоғида бутунлай ёниб кетган. Оқибатда бортдагиларнинг бари ҳалок бўлган. Улар қаторида Раисийдан ташқари Эрон ташқи ишлар вазири Амир Абдуллаҳён, Шарқий Озарбайжон губернатори Оятуллоҳ ал-Ҳошим ва Табриз имоми Муҳаммад Али ал-Ҳошим ҳам бор.
Иброҳим Раисий Озарбайжон раҳбари Илҳом Алиев билан учрашувдан қайтаётган бўлган. Давлат раҳбарлари Арас дарёсидаги тўғон очилиши маросимида иштирок этган.
- Иброҳим Раиси 2021 йилда Эрон президенти этиб сайланганди. Эроннинг 63 ёшли президенти ўз фаолиятини юридик соҳада бошлаган – у мамлакатнинг турли ҳудудларида прокурор лавозимларида ишлаган.
- Раисий 2014 йил мамлакат бош прокурори лавозимини эгаллаган, 2017 йил Эрон президентлигига номзод бўлган, аммо Ҳасан Руҳонийга ютқазган. 2021 йилги сайловларда 60 фоиздан ортиқ овоз билан ғалаба қозонган. Иброҳим Раисий ҳар доим ташқи сиёсатда Исроилни асосий душман деб билган ва унга қарши баёнотлар берган. Президент АҚШ ва Европа Иттифоқи санкциялари остида бўлган.
Эрон президенти Иброҳим Раисий 9 ноябрь куни рафиқаси Жамиле Аламолхода ҳамроҳлигида Тошкентга келганди. Шу куни Шавкат Мирзиёевнинг Эрон президенти Иброҳим Раисий билан учрашуви бўлиб ўтган. Унда Ўзбекистон—Эрон муносабатларини янада мустаҳкамлаш, савдо, инвестициялар, инновациялар ва транспорт соҳаларида амалий ҳамкорликни кенгайтириш масалалари муҳокама қилинган. Ўзаро мулоқотлар фаол давом этаётгани мамнуният билан қайд этилганди.
Изоҳ (0)