Eron prezidenti Ibrohim Raisiy bo‘lgan vertolyot 19-may kuni Eron-Ozarbayjon chegarasi yaqinidagi Verzegan shahri yaqinidagi tog‘li hududga “qattiq qo‘ndi”. 20-may kuni qutqaruvchilar vertolyot halokatga uchragan joyni aniqladi.
Qizil yarim oy jamiyati qutqaruvchilari, harbiylar va politsiya xodimlari ishtirokida keng ko‘lamli qidiruv operatsiyasi o‘tkazildi. Eron ichki ishlar vaziri Ahmad Vohidiy yomon ob-havo sharoiti qutqaruvchilarning halokat joyiga yetib borishini qiyinlashtirganini qayd etdi.
Turkiyaning tunda ko‘rish qobiliyatida ega Akinchi droni yordamida Eron prezidentini qidirish ishlari olib borildi. Eronga bir qancha davlatlar, jumladan Iroq, Turkiya, Saudiya Arabistoni, Rossiya, Iordaniya va Birlashgan Arab Amirliklari qidiruv-qutqaruv operatsiyasida yordam berishni taklif qildi. Yevropa Komissiyasi sun’iy yo‘ldosh xaritalarini taqdim etish uchun Copernicus EMS xizmatini ishga tushirdi.
Qutqaruvchilar vertolyot topilganini ma’lum qildi, biroq prezident Ibrohim Raisiyning ahvoli haqida hozircha ma’lumot yo‘q, deb xabar bermoqda Al Jazeera.
Eron rasmiysi Reuters agentligiga vertolyot qattiq qo‘nish chog‘ida butunlay yonib ketganini ma’lum qildi.
Raisiy vertolyoti halokatga uchrashi
Bortida Raisiy bo‘lgan vertolyot 19-may kuni Verzegan shahri yaqinidagi tog‘li hududga qattiq qo‘ngan. Bortda prezidentdan tashqari Eron tashqi ishlar vaziri Amir Abdullahyon va Sharqiy Ozarbayjon gubernatori Oyatulloh al-Hoshim bo‘lgan. Ibrohim raisiy Ozarbayjon rahbari Ilhom Aliyev bilan uchrashuvdan qaytayotgan bo‘lgan. Davlat rahbarlari Aras daryosidagi to‘g‘on ochilishi marosimida ishtirok etgan.
Hozircha Raisining ahvoli haqida hech narsa ma’lum emas. Halokat hududida noqulay ob-havo va quyuq tuman sababli qidiruv-qutqaruv ishlari aviatexnikalarsiz o‘tmoqda. Eronda aholi halokatga uchragan prezident va hamrohlariga omonlik tilab, ular haqqiga duo qilmoqda.
Eron prezidenti vafot etgan taqdirda, oliy rahnamo Xomanaiyning roziligi bilan uning vakolatlarini birinchi vitse-prezident Muhammad Moxber o‘z zimmasiga oladi. Eronda yangi prezidentlik saylovlari 50 kun ichida o‘tkazilishi kerak bo‘ladi.
Izoh (0)