Eron oliy rahnamosi Oyatulloh Ali Xomanaiy mamlakat prezidenti Ibrohim Raisiy va unga hamrohlik qilayotgan rasmiylar vertolyot “qattiq qo‘ngani”dan omon qolganiga umid bildirdi. Bu haqda IRNA agentligi xabar berdi.
Yaratgan hurmatli va muhtaram prezidentimiz Raisiy va uning safdoshlarini Eron xalqi bag‘riga qaytarishiga umid qilamiz, — dedi u va ularning salomatligi uchun duoga chorladi.
Shu bilan birga, Xomanaiy Eron xalqini xavotirlanmaslikka chaqirdi va “davlat boshqaruvida hech qanday uzilishlar bo‘lmasligi”ni ta’kidladi.
Raisiy vertolyoti halokatga uchrashi
Bortida Raisiy bo‘lgan vertolyot 19-may kuni Ozarbayjon bilan chegaradagi Julfa shahri yaqiniga “qattiq qo‘ngan”. Bortda prezidentdan tashqari Eron tashqi ishlar vaziri Amir Abdullahyon va Sharqiy Ozarbayjon gubernatori Oyatulloh al-Hoshim bo‘lgan. Ibrohim raisiy Ozarbayjon rahbari Ilhom Aliyev bilan uchrashuvdan qaytayotgan bo‘lgan. Davlat rahbarlari Aras daryosidagi to‘g‘on ochilishi marosimida ishtirok etgan.
Hozircha Raisining ahvoli haqida hech narsa ma’lum emas. Halokat hududida noqulay ob-havo va quyuq tuman sababli qidiruv-qutqaruv ishlari aviatexnikalarsiz o‘tmoqda. Eronda aholi halokatga uchragan prezident va hamrohlariga omonlik tilab, ular haqqiga duo qilmoqda.
Eron prezidenti vafot etgan taqdirda, oliy rahnamo Xomanaiyning roziligi bilan uning vakolatlarini birinchi vitse-prezident Muhammad Moxber o‘z zimmasiga oladi. Eronda yangi prezidentlik saylovlari 50 kun ichida o‘tkazilishi kerak bo‘ladi.
Izoh (0)