“Bizda yopiq sotish yoki boshqacha gap bo‘lishi mumkin emas” — Akmalxon Ortiqov

Keng jamoatchilik tarmoqlarda davlatga tegishli bo‘lgan mulklarni yopiq qarorlar asosida Davlat aktivlarini boshqarish agentligi tomonidan sotib yuborilayotgan bo‘lishi mumkinligi haqida fikrlar bildirgandi. Xususan, iqtisodchi Otabek Bakirov UNG Petro MCHJning 100 foiz ulushi yagona ta’sischi — Kamilov Daniyar Abdulazizovich egaligidagi Petroleum Technology Group MCHJga o‘tkazilgani ma’lum bo‘lib qolganiga qaramay, xususiylashtirishga mas’ul Davaktiv 20 kundan beri sukut saqlayotganini tanqid qilgan. Shuningdek, Uzpaynet MCHJdagi 100 foizlik davlat ulushi New Industrial Technologies kompaniyasi nazoratiga o‘tgani ham savol ostiga olingan.

Yuqoridagi holatlar yuzasidan Davlat aktivlarini boshqarish agentligi direktori Akmalxon Ortiqov “Daryo”ga izoh berdi.

Akmalxon Ortiqovning aytishicha, agentlikda yopiq sotish yoki boshqacha gap bo‘lishi mumkin emas.

Hammasining huquqiy asosi bor. Ayrim hollarda biz mana shu qonunlarga amal qilishga majburmiz — qonun bor. Masalan, “Mas’uliyati cheklangan jamiyatlar to‘g‘risida”gi qonunning 20-moddasiga asosan ulushni bir qismini savdoga chiqayotganimizda ikkinchi ulushdorga baholangan qiymatda sotib olishga roziligi bormi yoki yo‘qmi, degan so‘rovni amalga oshirishga qonun bizni majburlaydi. Shunday holatlarda biz uni ochiq savdoga chiqarishdan oldin, ikkinchi agar bir nechta bo‘lsa, bir nechta ta’sischilarga taklif qilishga majbur bo‘lamiz, — dedi agentlik rahbari.

Uning alohida ta’kidlashicha, ko‘plab muddat auksion savdosi sotilmay turgan bino-inshootlar yoki korxonalar bo‘yicha ba’zida noto‘g‘ri talqin qilish holatlari mavjud.

Biz sotilmaganidan keyin uning bahosini tushirishga majburmiz. Hozirgacha 50 foizgacha narxini tushirish mexanizmi bor edi. Yangi qarorga ko‘ra, yana qo‘shimcha 10 foizgacha tushirishimiz mumkin. Chunki biz uni ushlab turishdan manfaatdor emasmiz. Tezroq tadbirkorga yetkazib berishdan manfaatdormiz, — dedi Akmalxon Ortiqov.

Avvalroq Akmalxon Ortiqov davlat ulushi bor korxonalarning aksiya paketlari jismoniy shaxslarga sotish yo‘lga qo‘yilishini ma’lum qilgan edi.