Davlat ulushi bor korxonalarning aksiya paketlari jismoniy shaxslarga sotiladi. Bu haqda Davlat aktivlarini boshqarish agentligi direktori Akmalxon Ortiqov “Daryo” muxbiriga bergan qisqacha intervyusida aytib o‘tdi.
Unga ko‘ra, joriy yilda 250 ga yaqin davlat ulushi bo‘lgan aksiya paketlari, davlat korxonalari va mingdan ortiq ko‘chmas mulk obyektlari sotuvga chiqariladi.
Bu yil xususiylashtirish bo‘yicha katta dastur tasdiqlangan. Chunki xususiylashtirish davomiy jarayon bo‘lgani uchun har yili aktivlarni xatlovdan o‘tkazib, mahalliy bozorga taqdim qiladigan va xalqaro bozorlarga olib chiqadigan aktivlarimizni ro‘yxatini tasdiqlab olamiz.
Sotuvga qo‘yilgan 250 ga yaqin korxona ichida hozir bozorda xuddi shunday ko‘plab boshqa ishlab chiqaruvchilar va raqobat muhiti ta’minlangan korxonalar bor. Misol uchun “O‘zavtosanoat” AJ tarkibidagi ehtiyot qismlari ishlab chiqaruvchi 40 ga yaqin korxona shular jumlasidan. Bugun bunday ehtiyot qismlarini ishlab chiqaruvchilar bozorda bor. U davlat korxonasi emas, xususiy tadbirkor korxonasi bo‘lishi kerak. Bularning aksiya paketlari yoki jamiyatdagi ulushi savdoga chiqariladi, — dedi Akmaldan Ortiqov.
Uning qo‘shimcha qilishicha 12 ta korxonaning mahalliy fond bozorida IPO va SPO shaklda aksiyalari sotiladi.
Bularga Toshkent fond birjasi aksiyalari va ko‘pchilikka tanish bo‘lgan “E-auksion” elektron tizimi kiritilgan. Mazkur korxonalar davlat ulushi 100 foiz bo‘lgan aksionerlik jamiyatlaridir. Bu bilan xalqqa aksiyalarni sotib olish imkoni bermoqchimiz, — deydi Davaktiv direktori
Aprel o‘rtalarida Shavkat Mirziyoyevga 2024-yilgi xususiylashtirish dasturi va uning ijrosini samarali tashkil etishga qaratilgan chora-tadbirlar haqida axborot berilgandi. O‘shanda davlat aktivlari 3 oyda sotilmasa, (Toshkent shahri va viloyat markazlari bundan mustasno) ularning boshlang‘ich bahosi 10 foizgacha bosqichma-bosqich pasaytirilishi ma’lum qilingan edi.
Izoh (0)