Кенг жамоатчилик тармоқларда давлатга тегишли бўлган мулкларни ёпиқ қарорлар асосида Давлат активларини бошқариш агентлиги томонидан сотиб юборилаётган бўлиши мумкинлиги ҳақида фикрлар билдирганди. Хусусан, иқтисодчи Отабек Бакиров UNG Petro МЧЖнинг 100 фоиз улуши ягона таъсисчи — Камилов Данияр Абдулазизович эгалигидаги Petroleum Technology Group МЧЖга ўтказилгани маълум бўлиб қолганига қарамай, хусусийлаштиришга масъул Давактив 20 кундан бери сукут сақлаётганини танқид қилган. Шунингдек, Uzpaynet МЧЖдаги 100 фоизлик давлат улуши New Industrial Technologies компанияси назоратига ўтгани ҳам савол остига олинган.
Юқоридаги ҳолатлар юзасидан Давлат активларини бошқариш агентлиги директори Акмалхон Ортиқов “Дарё”га изоҳ берди.
Акмалхон Ортиқовнинг айтишича, агентликда ёпиқ сотиш ёки бошқача гап бўлиши мумкин эмас.
Ҳаммасининг ҳуқуқий асоси бор. Айрим ҳолларда биз мана шу қонунларга амал қилишга мажбурмиз — қонун бор. Масалан, “Масъулияти чекланган жамиятлар тўғрисида”ги қонуннинг 20-моддасига асосан улушни бир қисмини савдога чиқаётганимизда иккинчи улушдорга баҳоланган қийматда сотиб олишга розилиги борми ёки йўқми, деган сўровни амалга оширишга қонун бизни мажбурлайди. Шундай ҳолатларда биз уни очиқ савдога чиқаришдан олдин, иккинчи агар бир нечта бўлса, бир нечта таъсисчиларга таклиф қилишга мажбур бўламиз, — деди агентлик раҳбари.
Унинг алоҳида таъкидлашича, кўплаб муддат аукцион савдоси сотилмай турган бино-иншоотлар ёки корхоналар бўйича баъзида нотўғри талқин қилиш ҳолатлари мавжуд.
Биз сотилмаганидан кейин унинг баҳосини туширишга мажбурмиз. Ҳозиргача 50 фоизгача нархини тушириш механизми бор эди. Янги қарорга кўра, яна қўшимча 10 фоизгача туширишимиз мумкин. Чунки биз уни ушлаб туришдан манфаатдор эмасмиз. Тезроқ тадбиркорга етказиб беришдан манфаатдормиз, — деди Акмалхон Ортиқов.
Аввалроқ Акмалхон Ортиқов давлат улуши бор корхоналарнинг акция пакетлари жисмоний шахсларга сотиш йўлга қўйилишини маълум қилган эди.
Изоҳ (0)